<p style="text-align: justify;">کلات (پژواک، ۱۸ مرغومي ۱۴۰۱): د زابل مرستیال والي وايي، د دغه ولایت د اوسېدونکو له پرلهپسې غوښتنو وروسته په شملزو ولسوالۍ کې پر ډیورنډ فرضي کرښه د بادیني لار په اوونۍ کې څلور ورځې د مسافرو د تګ راتګ لپاره پرانیستل شوه.</p>
<p style="text-align: justify;">مرستیال والي سليمان اغا بهیر پژواک خبري اژانس ته وویل، د دغه ولایت په شملزو ولسوالۍ کې د بادیني لار د افغان او پاکستاني لوري په موافقه پرانیستل شوې ده.</p>
<p style="text-align: justify;">هغه زیاته کړه، دواړو غاړو ته مېشت قومونه له یو بل سره خپلوۍ او راشه درشه لري چې په همدغه بنسټ د زابل ولایتي ادارې له پاکستاني لوري سره مذکرات وکړل چې له مخې به یې دغه لار په اونۍ کې څلور ورځې (له دوشبنې تر پنجشنبې) د مسافرو د تګ راتګ لپاره پرانیستې وي.</p>
<p style="text-align: justify;">نوموړی زیاتوي، په ورځني ډول به ۱۵۰ مسافرو ته له دې غاړې او ۱۵۰ مسافرو ته له هغې غاړې د تګ راتګ اجازه ورکړل شي، خو کوم کسان چې بېړني ناروغان لري، څلورویشت ساعته به یې پر مخ لار پرانيستې وي.</p>
<p style="text-align: justify;">دی وايي، په سیمه کې د ټاکل شوې کمېټې له لوري- چې د سرحدي ځواکونو، امنیې قوماندانۍ، د سرحدونو او قبایلو چارو ریاست او استخباراتو استازي په کې شامل دي- د امنیت خوندیتوب او مسافرو د تذکرو د چکولو چارې مخ ته وړي.</p>
<p style="text-align: justify;">بهیر یادونه وکړه چې پر یاده لار د ترانزیټ او سوداګرۍ پیلولو په موخه د اړینو ودانیو او تاسیساتو جوړولو چاره له مرکزه د راغلي پلاوي له لوري وڅارل شوه چې په وینا یې ۲۰۸۰ جریب ځمکه ورته وټاکل شوه چې د جوړولو کار به یې د هوا له سمېدو سره پیل شي.</p>
<p style="text-align: justify;">د زابل مستوفي مولوي محمدحسن محسن پژواک خبري اژانس ته وویل، د زابل د شملزو ولسوالۍ د ګمرک په فعالېدو سره به دغه ولایت له اقتصادي پلوه ډېره وده وکړي.</p>
<p style="text-align: justify;">نوموړي زیاته کړه: «له اقتصادي اړخه به په سیمه کې د دغه ولایت اوسېدونکو ته د کار زمینه برابره شي، ورسره به تجارت شروع شي، توکي به ارزانه شي او زموږ د خلکو ژوند به ښه شي او ترڅنګ به یې زموږ عواید لوړ شي چې د ولایت درجه به ورسره پورته شي.»</p>
<p style="text-align: justify;">نوموړي هم هیلهمندي وښوده چې د ګمرک جوړولو او فعاله کولو چارې به ژر پیل شي.</p>
<p style="text-align: justify;">د زابل اوسېدونکي د لارې خلاصېدو ته خوښ دي او له چارواکو غوښتنه کوي چې پر دې لار د ترانزیټ او سوداګرۍ اسانتیاوې هم ژر برابرې کړي.</p>
<p style="text-align: justify;">د شملزو ولسوالۍ یوه اوسېدونکي عبدالولي خان پژواک خبري اژانس ته وویل، د بادیني لار په رسمي توګه د خلکو پر مخ پرانیستل شوه او لسګونه کسان ورباندې هغې غاړې ته واوښتل.</p>
<p style="text-align: justify;">نوموړي زیاته کړه، باید د ګمرک اړوند د تاسیساتو جوړولو لپاره کار وشي او دغه لاره دې د تجارت لپاره هم پرانیستل شي.</p>
<p style="text-align: justify;">د همدې ولسوالۍ بل اوسېدونکي وزیرمحمد پژواک خبري اژانس ته وویل، له شملزو تر مرکز کلات پورې غځېدلې لاره خامه او اوږده ده، خلک نه شي کولای خپل ناروغان د درملنې لپاره لومړی کلات او بیا د سپین بولدک له لارې پاکستان ته بوځي.</p>
<p style="text-align: justify;">دی وايي، اوس چې دغه لار پرانیستل شوې نو نه یوازې خپل ناروغان به پر وخت دغه هېواد ته بیايي، بلکې د ډیورنډ فرضي کرښې په دواړو غاړو کې مېشت قومونه چې له یو بل سره خپلوۍ لري، په اسانۍ تګ راتګ وکړي.</p>
<p style="text-align: justify;">خو ده هم له حکومته غوښتنه وکړه چې دغه لاره د ټرانزیټ او سوداګرۍ لپاره په رسمي ډول پرانیزي.</p>
<p style="text-align: justify;">زابل د هېواد په سوېل کې د کابل- هرات پر لویه لار پروت ولایت دی او د ډیورنډ له فرضي کرښې سره ۶۴ کیلومتره ساحه لري.</p>
