پارون (پژواک، ۹ سلواغه ۱۴۰۱): د پارون- اسعداباد لارې موټرچلوونکي وايي، د دغو دوو ښارونو ترمنځ غځېدلی سړک خام دی چې واورو او یخبندونو نور هم خراب کړی او دوی یې له ستونزو سره مخ کړي دي.
د یادې لارې یوه موټرچلوونکي ذاکرالله پژواک خبري اژانس ته وویل، د حکومت د نه پاملرنې له امله سړک ورځ تر بلې خرابېږي چې له امله یې د دوی موټر عوارض کوي او د ګټې پر ځای په تاوان کې روان دي.
هغه زیاته کړه: «سږ کال د پارون- اسعداباد لار تر بل هر کال خرابه او خطرناکه ده، ځکه هوارکاري یې نه ده شوې او په ځینو سیمو کې د غرونو ښویېدو خطر هم شته.»
د روحالله په نوم بل موټرچلوونکی هم د لارې له خرابوالي شکایت کوي او وايي، سږ کال د واورو اورښت او سړې هوا له امله د لارې په اوږدو کې یخبندونه ډېر شوي چې د موټر د غورځېدو خطر یې ډېر کړی دی.
هغه زیاته کړه، په ټوله کې بشپړه لاره سخته خرابه ده خو له سټاپ سیمې د چتراس تر خوړ پورې ۱۰ کیلومتره لار له یخبندونو ډکه ده او هره شېبه پرې د موټر د چپه کېدو وېره ده.
هغه وايي، مسوولین دې د موټرچلوونکو او مسافرو دې ستونزې ته پام وکړي، که دغه لار په اساسي ډول نه شي جوړولای نو لږ تر لږه هوارکاري یې باید وکړي.
د نورستان د ټولګټو چارو رییس مولوي احمد نبي پژواک خبري اژانس ته وویل، هڅه یې کړې دغه لار تل پرانیستې وساتي او خلک له ستونزو سره مخ نه شي.
دی زیاتوي، د سړک د اساسی جوړولو پلان یې هم له مرکز سره شریک کړی او ډاډ ورکړل شوی چې د مالیې وزارت پرې کار کوي.
د نورستان د والي ویاند سیفالدین لټون هم وايي چې والي حافظ محمداغا حکیم پلازمېنې کابل ته په خپل وروستي سفر کې د ټولګټو چارو وزارت له سرپرست مولوي عبدالمنان عمري سره د پارون- اسعداباد سړک پر اساسي جوړولو خبرې کړې دي.
د هغه په خبره، وزارت ژمنه کړې چې د دغه سړک جوړول به د راتلونکي کال په بودجه کې شامل کړي.
د پارون-اسعداباد سړک د ۲۲ کیلومتره برخې د اساسي جوړولو چارې د تېر جمهوري نظام په وروستیو کې د ټولګټو وزارت له لوري د بلال تواب په نوم ساختماني شرکت ته په قرارداد ورکړل شوې وې چې عملي کار یې هم پيل شوی و خو له سیاسي تحول وروسته په ټپه ودرېد.
یاد سړک ټولټال ۸۴ کیلومتره اوږدوالی لري چې له پېچومو تېرېږي او په ژمي کې د واورو او اورښتونو له امله په ورځو ورځو د ترافیکو پر مخ تړلې وي.
Visits: 103
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن