پلخمري (پژواک، ۲۵ سلواغه ۱۴۰۱): په بغلان کې د غالیو سوداګر وايي، د تېرو کلونو په پرتله په دغه ولایت کې د غالیو د پېر او پلور بازار په بېسارې توګه کمرنګه شوی دی.
سوداګر د غالیو بازار د کمرنګه کېدو لامل د خلکو اقتصادي ستونزې او په ټوله کې د خلکو وزګارتیا بولي.
د بغلان په مرکز پلخمري ښار کې د غالیو یو سوداګر احمدضیا د سلواغې په ۲۵مه پژواک اژانس ته وویل، د تېرو کلونو په پرتله په دغه ولايت کې د غالیو پېر او پلور په بېسارې توګه کمرنګه شوى دى.
هغه وايي: «۱۶ کاله کېږي چې زه د قالینو کار کوم، خو په تېرو ټولو کلونو کې د سږ کال په څېر سوړ مارکېټ ما نه و ليدلى.»
نوموړی زیاتوي، پخوا به يې هره ورځ يوه يا دوې غالۍ پلورلې خو اوس ١٥ ورځې کېږي چې يوه يې هم نه ده پلورلې.
د هغه په وينا، د خلکو اقتصادي ستونزې او وزګارتيا د دې لامل شوی چې د غاليو پېر او پلور کم شي.
دغهراز د پلخمري ښار د غالیو يو بل پلورونکى وليالرحمن وليزاده وایي چې د تېرو کلونو په ځانګړي ډول په پسرلي او مني موسم کې به د غاليو پېر او پلور ډېر ښه و؛ ځکه خلکو به ودونه کول خو سږ کال په دغو موسمونو کې بازار ډېر سوړ و.
هغه وويل، که د غاليو بازار همداسې ادامه پيدا کړي نو ډېر خلک به دغه کاروبار پرېږدي.
همدارنګه په پلخمري ښار کې د غالیو پلورونکو اتحادېې مشر حاجي ګلاغا هم د غالۍ پلورونکو اندېښنې پر ځای بولي او وایې، ۱۸ کاله کېږي چې په دغه ښار کې د غالیو کاروبار کوي خو سږ کال يې بازار دومره سوړ دى چې غواړي دغه کاروبار نور پرېږدي.
دى زياتوي: «نن اتمه ورځ ده چې يوه دانه قالينه مې نه ده پلورلې، خلک ډېر غريب شوي، يوې مړۍ ډوډۍ ته حېران دي نو قالين به څنګه واخلي.»
د اړوندې موضوع په اړه د بغلان د والي وياند ملا عالم مجیدي پژواک ته وويل چې په دغه ولایت کې د امنیت له ټینګښت سره سوداګرو ته د کار ډاډمنه فضا رامنځته شوې ده.
هغه زياته کړه چې سيمهييزه اداره کوښښ کوي څو د قالينو د سوداګرو ترڅنګ د ټولو سوداګرو توکو او توليداتو ته په کور دننه او بهر کې بازار پيدا کړي.
Visits: 70
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن