<p style="text-align: justify;">جلالاباد (پژواک، ۶ کب ۱۴۰۱): د ننګرهار ولايت چارواکي وايي، د تورخم دروازه له شپږ ورځې تړل کېدو وروسته نن سهار شاوخوا شپږ بجې په بشپړه توګه د مسافرو او ټرانزيټ پر مخ خلاصه شوه.</p>
<p style="text-align: justify;">د ننګرهار ولايت چارواکي وايي، یاده دروازه د پاکستاني چارواکو له خوا د کړو ژمنو نه عملي کېدو په غبرګون کې تړل شوې وه.</p>
<p style="text-align: justify;">د ننګرهار د اطلاعاتو او کلتور رياست د اطلاعاتو امر قريشي بدلون نن (د کب ۶مه) پژواک اژانس ته وويل، د افغان او پاکستاني مسوولينو د مذاکراتو په پايله کې تېره شپه اجازه ترلاسه شوه او نن سهار شاوخوا شپږ بجې دغه دروازه د هر ډول قانوني تګ راتګ لپاره پرانیستل شوه.</p>
<p style="text-align: justify;">هغه وايي، اوس مسافر او ټرانزيټ کولی شي چې د قانوني اسنادو په لرلو سره تګ راتګ وکړي او همداراز ناروغانو او د هغوی پايوازانو ته به هم د قانوني پروسې تر پلې کولو وروسته له پاسپورټ پرته د تګ اجازه ورکول کېږي.</p>
<p style="text-align: justify;">په ورته وخت کې، د ننګرهار ولايت د رسنيو دفتر هم پژواک ته په راستولې خبرپاڼه کې دغه خبر تاييد کړی دی.</p>
<p style="text-align: justify;">په خبرپاڼه کې هغو هېوادوالو ته هم خبر ورکړل شوی چې پخوا يې ناروغان پاکستان ته د تګ لپاره د ناروغانو د تګ کمېسيون له خوا تاييد شوي وو او اوس کولای شي د تورخم له لارې پاکستان ته لاړ شي.</p>
<p style="text-align: justify;">د پاچا په نوم د تورخم ښارګوټي يوه هټۍوال پژواک اژانس ته وويل، نن سهار دروازه خلاصه شوې، له دواړو خواوو مسافر او لارۍ موټرونه تګ راتګ کوي.</p>
<p style="text-align: justify;">د تورخم دروازې د تړل کېدو له امله په جلالاباد ښار کې د ځينو خوراکي توکو او تازه مېوو نرخونه هم لوړ شوي دي.</p>
<p style="text-align: justify;">د جلالاباد ښار يوه اوسېدونکي عبدالله پژواک ته وويل، يو کيلوګرام پاکستانۍ مالټه (کينو) چې پخوا په ۸۰ افغانۍ خرڅېده، د دروازې د تړل کېدو له امله يې نرخ دوه برابره لوړ شوی دی.</p>
<p style="text-align: justify;">د ننګرهار ولايت سوداګر هم وايي چې د دروازې د تړل کېدو له امله ورته سخت مالي زيانونه اوښتي دي.</p>
<p style="text-align: justify;">د ننګرهار د سوداګرۍ خونې غړی او سوداګر ډاکټر مخلص وايي، د دروازې تړل کېدو هر سوداګر ته په ميليونونو افغانۍ زيان اړولی دی.</p>
<p style="text-align: justify;">هغه له دواړو حکومتونو غواړي چې سوداګري دې د خپلو سياستونو ښکار نه ګرځوي، ځکه د دې چارې له امله عام ولس او سوداګرو ته ډېر زيان اوړي.</p>
<p style="text-align: justify;">تورخم په ډيورنډ کرښه د ننګرهار د مومندرې ولسوالۍ اړوند يوه سيمه ده چې له دې لارې پاکستان ته تګ راتګ کېږي.</p>
