کابل (پژواک، ۲۹ کب ۱۴۰۱): په ۱۴۰۱ کال کې یو میلیارد او ۵۳۶ میلیون ډالره نغدي بشري مرسته افغانستان ته رارسېدلې او دغه کچه د تېر کال په وروستیو څلورو میاشتو کې ۴۵۴.۴ میلیون ډالر وه.
افغانستان کې په تېرو ۱۶ میاشتو کې د دغو مرستو ټولیزه کچه نږدې دوه میلیارد (۱۹۹۰.۴ میلیون ډالرو) ته رسېږي.
تېر کال د زمري میاشتې په ۲۴مه د افغانستان اسلامي جمهوریت له منځه ولاړ او ځای یې اسلامي امارت ونیو.
له دغه تحول وروسته د امریکا متحده ایالتونو د افغانستان پر نوي سرپرست حکومت بندیزونه ولګول او د افغانستان څه باندې نهه میلیارد ډالر شتمني یې کنګل کړه او دغه کار په افغانستان کې د سختو اقتصادي ستونزو لامل شو، خو له لږ ځنډ وروسته نړۍوالې ټولنې له افغانستان سره مرستې پیل کړې.
افغانستان بانک تېر کال د لېندۍ په لسمه اعلان وکړ چې ۱۶ میلیون امریکایي ډالر بشري مرسته کابل ته راورسېده او یوه خصوصي بانک ته وسپارل شوه.
د افغانستان بانک د معلوماتو له مخې، تېر کال د لېندۍ په لسمه د یادو مرستو لومړۍ کڅوړه (۱۶ میلیون ډالره)، د همدې میاشتې په ۱۶مه دویمه کڅوړه (۱۶ میلیون ډالر) او ورپسې دوه ۱۹.۳ میلیون ډالري کڅوړې او د تېر کال تر پایه دوولس ۳۲ میلیون ډالري کڅوړې کابل ته راورسېدې.
د یاد بانک پر وېبپاڼه د خپاره شوو معلوماتو له مخې، د تېر کال په وروستیو څلورو میاشتو کې د دغو مرستو ټولټال کچه ۴۵۴.۴ میلیون ډالرو ته ورسېده.
د سرچینې معلومات ښیي چې په روان ۱۴۰۱ کال د دغو مرستو ټولیزه کچه یو میلیارد او ۵۳۶ میلیون ډالر کېږي.
په روان کال کې د دغو بشري مرستو دیارلس «۳۲ میلیون ډالري» او اته ویشت «۴۰ میلیون ډالري» کڅوړې افغانستان ته رارسېدلې دي.
د دغو مرستو وروستۍ کڅوړه د روانی کب میاشتې په ۲۳مه هېواد ته رارسېدلې ده.
د افغانستان بانک مرستیال ویاند حسیب الله نوري د روان کال په لړم میاشت کې پژواک خبري اژانس ته ویلي وو چې دغه بشري مرستې د امریکا متحده ایالتونه، اروپا او نور هېوادونه کوي.
هغه ویلي وو: «لکه څرنګه یې چې له نوم څخه ښکاري، بشري مرستې دي او په همدې بشري برخو کې لګول کېږي.»
په افغانستان کې د ملګرو ملتونو سیاسي استازولي (يوناما) په تېره مرغومي میاشت کې ویلي وو چې له افغانستان سره د ملګرو ملتونو نغدي مرستې په يوه خصوصي بانک کې د ملګرو ملتونو په بانکي حسابونو کې ساتل کېږي او د ملګرو ملتونو ادارې له دغو پیسو د خپلو بشري فعاليتونو لپاره کار اخلي.
د اقتصادي چارو پوه قیس محمدي مخکې پژواک خبري اژانس ته ویلي وو چې دغه مرستې د افغانستان پر اقتصاد او د خلکو پر ژوند مثبت اغېز لري.
د هغه په وینا، په افغانستان کې د نوي سرپرست حکومت په جوړېدو سره د افغانۍ پر وړاندې د ډالر بیه لوړه شوه او ورسره د خوراکي توکو بیې هم لوړې شوې چې خلک یې ډېر زیات اندېښمن کړل، خو همدا مرستې وې چې افغانۍ ورسره بیا ثبات پیدا کړ.
Visits: 98
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن