اټلانټا (پژواک، ۲ وری ۱۴۰۲): د افغانستان د ۱۹ کلنو کرکټ لوبډلې په یوه ورځنۍ لوبه کې د سریلانکا ۱۹ کلنې لوبډلې ته ستره ماتې ورکړه.
د افغانستان کرکټ بورډ وایي، د ۱۹کلنې ملي لوبډلې لوبډلمشر نعمان شاه پچه وګټله او لومړی یې خپله د توپوهنې پرېکړه وکړه. افغان لوبډلې په ۴۹.۲ اورونو کې د خپلو ټولو لوبغاړو په سوځېدو سره ۲۹۹ منډې هدف وټاکه.
د افغان ستورو له ډلې محمد هارون خان ۸۸، خالد تڼیوال ۴۵، کامران هوتک ۴۳ او سهیل خان ۳۴ منډې ترسره کړې.
د سریلانکا ۱۹کلنې ملي لوبډلې د افغان ستورو د توپ اچونې پر وړاندې یوازې ۲۳۶ منډو کې خپل ټول لوبغاړي له لاسه ورکړه او د ۶۲ منډو په توپیر سره یې ماتې ومنله.
د افغان ۱۹کلنې ملي لوبډلې په ګټه یما عرب ۴، خلیل احمد ۳، کامران هوتک ۲ او بشر احمد افغان یو لوبغاړی د لوبې له ډګر بهر کړل.
د افغانستان ۱۹ کلنو ملي لوبډلې ستوری لوبغاړی یما عرب د څلورو مهمو ویکټو په ترلاسه کولو سره د لوبې غوره لوبغاړی ونومول شو.
افغانستان تر دې مخکې بنګله دېش ته هم ماتې ورکړې وه.
د یادوونې وړه ده چې د روانې درې اړخیزې لوبلړۍ په لړ کې به افغان ۱۹کلنه ملي لوبډله خپله دریمه سیالۍ راتلونکې جمعه د بنګله دېش ۱۹کلنې ملي لوبډلې سره ترسره کړي.
Visits: 50
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن