ایبک (پژواک، ۴ لړم ۱۴۰۲): په سمنګان ولایت کې د افغان پرمختیايي خیریه موسسې له خوا «د بشري حقونو د ښه کېدو او له داخلي بېځایه شوو د ساتنې» تر سرلیک لاندې یو پروګروام ترسره شو.
دغه پروګرام کې ښځو، نارینهوو او د سیمهییزې شورا غړو ته د ظرفیت جوړونې لنډمهاله زدهکړې ورکړل شوې.
د افغان پرمختیایي خیریه موسسې ولایتي مسوول احمد فواد عمري پژواک ته وویل چې یادې موسسې په سمنګان کې د ۲۰۲۳ کال د جون میاشتې په لومړۍ نېټه د بشري حقونو د ښه کېدو او له داخلي بېځایه شوو د ساتنې په نوم پروژه پیل کړې او د ۲۰۲۴ کال د فبرورۍ میاشتې پورې به دوام وکړي.
د عمري په خبره، د دغه لنډمهاله کورس له لارې د اسلام په رڼا کې ښځو، نارینهوو او ځوانانو ته د بشري حقونو، د ښځو میراث او ټولنیز پوهاوی د دغه پروګرام محتوا ده.
هغه وویل په دغه پروګرام کې د سیمهییزې شورا غړو ته د شخړو د حل په برخه کې هم زدهکړې ورکړل شوې دي.
دغه پروګرام چې د سیمهییزې شورا، ځوانانو او قومي مشرانو د ۴۰ غړو په ګډون په سمنګان کې ترسره شو، ګډونوالو یې د دغه ډول تعلیمي پروګرامونو له جوړېدو خوښي وښوده.
د یادې موسسې د شخړو د حل په پروګرام کې یوه ګډونوال ضیاءالدین سارباغي د دغه پروګرام له ګټو یادونه وکړه، ویې ویل: «په دغه پروګرام کې مو د سولې، د یو بل منلو، ټولینز ګډون او د سیاسي ثبات موضوعات زده کړل چې زموږ لپاره ډېر ارزښتمن وو.»
نوموړي وویل: «اوس موږ پوهیږو چې د کورنیو او کلیو د شخړو هوارولو کې له کومو لارو استفاده وکړو څو ستونزې یې حل کړو.»
د دغه پروګرام یو بل ګډونوال محمدانور صادقي له افغان خیریه موسسې د داسې پروګرام د دوام غوښتنه کوي، وایي: «له دې لارې زموږ د پوهې کچه لوړیږي، څو موږ د کلیو نورو خلکو ته هم زدهکړې ورکړو.»
افغان خیریه موسسې له دې مخکې هم د اسلام په رڼا کې د بشري حقونو، د ښځو د میراث او د ټولنیز عامه پوهاوي په برخه کې ښځو، نارینهوو ته پروګرامونه ترسره کړي دي.
Views: 44
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن