کابل (پژواک، ۱۸ لړم ۱۴۰۲): د افغانستان د فوټبال ملي لوبډلې درېیو لوبغاړو په یوه لیک کې فیفا او د اسیا فوټبال کنفدراسیون ته د هېواد د فوټبال په فدراسیون کې د فساد شکایت کړی، خو د دغه فدراسیون مسوولین وایي چې دا ادعاوې حقیقت نه لري.
ګارډین ورځپاڼې د تېرې دوشنبې په ورځ یوه راپور کې ویلي چې د افغانستان فوټبال ملي لوبډلې د درېیو لوبغاړو له خوا فیفا او د اسیا کنفدراسیون ته شکایتلیک استول شوی دی.
د یاد راپور له مخې، په دغه لیک کې د افغانستان فوټبال په فدراسیون کې د جدي فساد خبره شوې ده.
راپور کې راغلي چې له دغو لوبغاړو دوه یې فرشاد نور او فیصل شایسته دي.
سرچینې ویلي چې په دغه لیک کې له فیفا غوښتل شوي چې د هغو ادعاوو په اړه څېړنه وکړي چې د افغانستان د فوټبال فدراسیون لوړپوړي چارواکي له هغې بودجې سوء استفاده کوي چې ټاکل شوې د هېواد د فوتبال په پراختیا کې وکارول شي.
فیصل شایسته په دې اړه ویلي: « موږ غواړو چې نړۍ ته مثبت افغانستان وښایو، نو له دې کبله له فیفا غواړو چې زموږ له فدراسیونه مالي ملاتړ ودروي؛ ځکه چې پیسې هغه بانډ ته ځي چې د هېواد پر فوټبال حاکم دی.»
بلخوا، د افغانستان د فوټبال فدراسیون رییس محمدیوسف کارګر تېره ورځ د ملي لوبډلې د نوي روزنکي د معرفي په ناسته کې وویل چې دا ادعاوې دروغ دي او حقیقت نه لري.
د هغه په خبره، دا ادعاوې هغه کسان کوي چې د افغانستان د فوټبال د تخریبولو هڅې کوي.
خو هغه ټینګار وکړ: «هیچاته اجازه نه ورکوو چې د افغانستان فوټبال تخریب کړي.»
د افغانستان فوټبال فدراسیون جنرل سکرتر بهرام صدیقي هم دغه تورنه رد کړي دي.
دا په داسې حال کې ده چې د روان کال د لړم میاشتې په ۲مه د افغانستان فوټبال ملي لوبډلې ځينو لوبغاړو له دې امله خپلې دندې پرېښودې چې د دوی په وینا د فوټبال په فدراسیون کې فساد شته او ویلي وو چې له دې وروسته حاضر نه دي، په دې لوبډله کې ولوبیږي.
په دغه لېست کې فیصل شایسته، امېد پوپلزی، رحمت اکبري، عمران حیدري، نجم حیدري او ځيني نور لوبغاړي شامل دي.
