<p style="text-align: justify;">جلالاباد (پژواک، ۱۰ مرغومی ۱۴۰۲): ننګرهار کې له پاکستانه راستانه شوي يو شمېر کډوال وايي، روان ژمي کې د سرپناه نشتوالي، د اولادونو ناروغيو او بېکارۍ يې د ژوند شپې ورځې ور ترخې کړې او له حکومته غوښتنه کوي چې مرسته ورسره وکړي.</p>
<p style="text-align: justify;">زړګی چې له ۲۳ کلنې کډوالۍ وروسته هېواد ته راستون شوی او د ننګرهار سرهرود ولسوالۍ په فتحاباد سيمه کې مېشت دی، پژواک خبري اژانس ته وويل، نږدې دوه مياشتې کېږي هېواد ته راستون شوی خو تر اوسه يې ځان ته کار نه دی پیدا کړی.</p>
<p style="text-align: justify;">هغه زیاتوي: «موږ راغلي يو، د يوې روپۍ، يوې انۍ کار موږه نه دی کړی، چې يوې خوا او بلخوا سوچ هم کوو، څه درک نشته، بل ژمی دی او ژمی سخت وي.»</p>
<p style="text-align: justify;">دغه راز يو بل کډوال عبدالله چې د جلالاباد ښار دويمه ناحيه کې د خپل خسر په کور کې مېشت دی وايي، له تېرو شاوخوا دوو مياشتو راهیسې هېواد ته راستون شوی خو نه يې د کار درک شته او نه هم په کرايه د کور نيولو توان لري.</p>
<p style="text-align: justify;">هغه پژواک ته وويل: «ژمی دی، ناروغۍ ډېرې دي، يو ماشوم مې ډاکټر ته نه وي راوستی چې بل وروړم، کار هم نشته، کله يو خپلوان نه قرض او کله بل نه، ډېر په ستونزه کې يم.»</p>
<p style="text-align: justify;">دغه راز يو بل کډوال ظهور چې د ننګرهار د خوږياڼو ولسوالۍ اړوند په چمتلې سيمه کې اوسېږي، وايي، له راتګ څخه يې دوه مياشتې تېرې شوې خو تر اوسه يې کار نه دی پیدا کړی.</p>
<p style="text-align: justify;">دی وايي: «نه کار شته او نه هم کور لرو، د بل چا کور کې اوسېږم، ژمی دی، ناروغۍ هم ډېرې دي، موږ سره باید کومک وشي.»</p>
<p style="text-align: justify;">چارواکي هم د راستنو شوو کډوالو ستونزې مني او وايي، ورسره لومړنۍ مرستې شوې دي.</p>
<p style="text-align: justify;">د ننګرهار د کډوالو او بېرته راستنېدونکو چارو رييس بازمحمد عبدالرحمن وايي، تر اوسه شاوخوا ۵۶ زره کورنۍ له پاکستانه راستنې شوې چې ډېرې يې په دغه ولایت کې مېشتې شوې دي.</p>
<p style="text-align: justify;">د نوموړي په خبره، د ۱۷ ولايتونو کډوال په مرکز جلالاباد او ولسواليو کې مېشت شوي دي.</p>
<p style="text-align: justify;">هغه زياته کړه: «په پلان کې لرو چې دا کورنۍ خپلو سیمو ته لاړې شي، خپلو سيمو کې مېشتې شي، له دوی سره خو موسسات کومکونه هم کوي او موږ هم هڅه کوو چې د دوی ټولو ستونزې حل شي.»</p>
<p style="text-align: justify;">دغه راز د کډوالو چارو سرپرست وزير خليلالرحمن حقاني چې ننګرهار ته يې د کډوالو ستونزو اورېدو او حل په موخه سفر کړی و، وويل چې د کډوالو د سرپناه، کار او نورو ستونزو د حل لپاره د کډوالو چارو عالي کمېسيون په ګډه کار روان کړی دی.</p>
<p style="text-align: justify;">هغه زياته کړه: «موږ د ملګرو ملتونو د يواېناېچسيار او ایاواېم ادارو له مسوولينو غوښتي چې پنځه سوه زره کورونو جوړېدو برخه کې له موږ سره مرسته وکړي، دوی هم موږ ته وعده راکړې، دا کورونه به ټولو مهاجرو ته جوړېږي، نوي وي او که زاړه خو چې مهاجر وي.»</p>
<p style="text-align: justify;">له پاکستانه خپل هېواد ته د افغان کډوالو د راتګ لړۍ هغه وخت زور واخیست چې پاکستاني چارواکو له دغه هېواده د غیرقانوني کډوالو ايستلو لړۍ د نومبر په لومړۍ نېټه پیل کړه.</p>
