<p style="text-align: justify;">کابل (پژواک، ۱۲ سلواغه ۱۴۰۲): د ملګرو ملتونو سازمان د خوړو نړۍوال پروګرام وايي، په راتلونکو شپږو میاشتو کې افغانستان کې د بشردوستانه فعالیتونو دوام لپاره ۷۶۰ میلیون ډالرو ته اړتیا لري.</p>
<p style="text-align: justify;">دا په داسې حال کې ده چې د ملګرو ملتونو د خوړو نړۍوال پروګرام (ډبلیواېفپي) څلور ورځې مخکې ویلي وو، د دغه پروګرام د بودجې کموالي له امله افغانستان کې ۱۰ میلیون کسان د دغه پروګرام له مرستو بېبرخې پاتې شوي چې ډېری یې باید په دغه ژمي کې خپلو ماشومانو ته د خوړو او ګرمو جامو ترمنځ یو وټاکي.</p>
<p style="text-align: justify;">یاد نړۍوال پروګرام نن (د سلواغې ۱۲مه) پر اېکسپاڼه د یوې ویډیو په خپرولو یوې مېرمنې ته په اشاره ویلي: «بيبي جان یوه له هغو ۱۰ میلیون کسانو ده چې تېر کال د بودجې سخت کمښت له امله د خوړو نړۍوال پروګرام له مرستو بېبرخې پاتې وه.»</p>
<p style="text-align: justify;">ویډیو کې د یادې مېرمنې له قوله راغلي: «خاوند مې فلج دی، د کور لګښت مو دا موسسه راکوي، اوس چې مرستې بندې شوې، ګوزاره مو نه کېږي، کله کله خیرات ټولوو، هیڅ څه نه لرو، کار هم نه لرو، د خلکو له کورونو اوبه راوړو، ځیني خلک خپل زکات او خیرات یا یوه او دوه بوجۍ غنم راکوي او خپل ژوند مخ ته وړو.»</p>
<p style="text-align: justify;">یاد پروګرام ویلي، د ۲۰۲۴ کال په راتګ سره د هغو ۷۸ هېوادونو ۳۳۳ میلیون کسان چې د خوړو نړۍوال پروګرام فعالیت په کې لري، له سختې لوږې سره مخ دي او هغوی نه پوهېږي چې د بل وخت ډوډۍ به له کومه کوي.</p>
