<p style="text-align: justify;">شبرغان (پژواک،۱۹ سلواغه ۱۴۰۲): د جوزجان سیمهییزې سرچینې د دغه ولایت په مریادن ولسوالۍ کې د یوه روغتیايي کلینیک له جوړېدو خبر ورکوي؛ بلخوا، د دې ولسوالۍ یو شمېر اوسېدونکي وايي چې مخکې یې د معیاري روغتیايي مرکز نشتون له امله خپل ناروغان د دغه ولایت مرکز ته لېږدول.</p>
<p style="text-align: justify;">د جوزجان د عامې روعتیا ریاست د معلوماتو له مخې، دغه روغتیايي مرکز چې د ۲۳ میلیون او ۷ سوه زره افغانیو په لګښت په مریان ولسوالۍ کې په یوه پوړ کې جوړ شوی، خلکو ته بنسټیز روغتیايي خدمات وړاندې کوي.</p>
<p style="text-align: justify;">د جوزجان د عامې روغتیا رییس قاري ذبیحالله حسیني وویل، له دې مخکې د دې ولسوالۍ خلکو ابتدايي روغتیايي خدمتونو ته لاسرسی نه درلود خو د دغه کلینیک په پرانیستو سره دوی ته د ښو روعتیايي چوپړتیاوو زمینه برابریږي.</p>
<p style="text-align: justify;">حسیني زیاته کړه، دوی د یاد کلینیک د ودانۍ جوړولو سربېره له ماشومانو د ملاتړ موسسې په همکارۍ د تغذیې یوه برخه هم فعاله کړې چې ۱۴ بسترونه لري.</p>
<p style="text-align: justify;">د دغې ولسوالۍ یو شمېر اوسېدونکي د یاد کلینیک له پرانیستو هرکلی کوي.</p>
<p style="text-align: justify;">د مردیان ولسوالۍ اوسېدونکی قربان ګلیدي د دغه کلینیک پرانیستو ته خوښ دی او وايي چې له دې مخکې مجهز روغتیایي مرکز ته د نه لاسرسي له امله د ولایت مرکز ته تلل.</p>
<p style="text-align: justify;">هغه زیاته کړه چې له دې مخکې روغتیايي مرکزونو ته د اوږو وټنونو وهلو له امله ناروغانو ته تکلیف رسېده.</p>
<p style="text-align: justify;">دغهراز د دې ولسوالۍ بل اوسېدونکي محمدالله وویل: «مخکې به موږ مجبور وو چې لسګونه کیلومتره لارې په وهلو سره خپل ناروغ د اقچې ولسوالۍ کلینیک او یا شبرغان ښار ته ولېږدوو، اوس الحمدالله د یوه ښه کلینیک څخه برخمن شوو.»</p>
<p style="text-align: justify;">هغه وویل: «مخکې د لارې لرې والي له امله موږ د داسې پېښو شاهدان وو چې یا به د ناروغ وضعیت ډېر خرابېده او ان ځینې ناروغانو به ژوند له لاسه ورکاوه.»</p>
<p style="text-align: justify;">د سیمې بل اوسېدونکي شمسالله هم د یاد کلینیک پر جوړېدو خوښ دی او وايي: «د دغه کلینیک د جوړېدو له امله له اسلامي امارته مننه کوو، خو غواړو چې د څښاک پاکو اوبو، سړک او برېښنا چې زموږ درې اصلي ستونزې دي، هم رسېدنه وکړي.»</p>
<p style="text-align: justify;">د هغه په وینا، د معیاري کلینیک نه درلودو له امله اړ وو څو د څه باندې سل کیلومتر لارې په وهلو سره خپل ناروغ د جوزجان ولایتي روغتون ته ولېږدوي.</p>
<p style="text-align: justify;">په همدې حال کې، د دې ولسوالۍ بل اوسېدونکی اسدالله وايي: «موږ غریب او لرو سیمو کې پراته خلکو یو، دغه روغتیايي مرکز موږ ته ډېر ښه شو، اوس کولای شو په خپله سیمه کې د ناروغانو درملنه وکړو.»</p>
<p style="text-align: justify;">هغه هم وویل چې مخکې به یې اوږد مزل کاوه څو د ولسوالۍ مرکز ته ورسیږي.</p>
<p style="text-align: justify;"></p>
