<p style="text-align: justify;">سرپل (پژواک، ۲۴ غویی ۱۴۰۳): سرپل کې یوه متشبثه مېرمن وحیده فیضي چې تازه یې د شیرینيپزۍ یوه کارخونه جوړه کړې، وايي، که ملاتړ یې وشي، کولای شي ډېرو نورو ښځو ته هم د کار زمینه برابره کړي.</p>
<p style="text-align: justify;">د سرپل په مرکز کې د خوږو خوړو پخولو کارخونې بنسټګرې وحیدې فیضي پژواک خبري اژانس ته وویل چې دغه کارخونه یې پنځلس ورځې مخکې د خپل ځان او یو شمېر نورو مېرمنو د پر ځانبسیاینې په موخه د ۶۰ زره افغانیو په لګښټ جوړه کړې ده.</p>
<p style="text-align: justify;">هغه چې دغه کارخونه یې په سرپل ښار کې په خپل کور کې جوړه کړې، وايي: «په دغه کارخونه کې ډول ډول کلچې، کیک، بغلاوه او محفلي کیکونه چمتو او بازار ته وړاندې کېږي، دمګړۍ ۵۰ نجونې او ښځې په دغه کارخونه کې د کیک او کلچو پخول زده کوي، پلان لرم چې دغه شمېر ۱۵۰ تر ۲۰۰ کسانو ورسوم.»</p>
<p style="text-align: justify;">هغې څرګنده کړه چې اوس یې بودجه او مالي امکانات لږ دي، خو د کارخانې د ودې یا موسسو او حکومت د مرستې په صورت کې به له هغې سره کارکوونکو نجونو او ښځو ته معاش هم ورکړي او د پر ځانبسیاینې زمینه به ورته برابره کړي.</p>
<p style="text-align: justify;">دې متشبثې ښځې زیاته کړه: «هغه نجونې چې له ما سره په دغه کارخونه کې بېمعاشه کار کوي، د مرکز سرپل د مختلفو ځایونو اوسېدونکې دي او غواړي د کیک او کلچو پخول زده کړي.»</p>
<p style="text-align: justify;">د دې کارخونې یوه کارکوونکې زهرا حسیني وايي: «ډېره خوشحاله یم چې د کیک او کلچو پخولو د زدهکولو زمینه راته برابره شوې، غواړم د دغه کسب په زده کولو سره خپل کاروبار په لاره واچوم.»</p>
<p style="text-align: justify;">هغې زیاته کړه چې ښځې او نجونې د داسې فرصتونو برابرېدو ته خوشحاله کېږي، څو د کورنۍ له نورو غړو سره د لګښتونو په پوره کولو کې مرسته وکړي.</p>
<p style="text-align: justify;">د دې کارخونې بلې کارکوونکې نجیبې وویل: «خوشحاله یم چې د کار زدهکوونکې په توګه په دې کارخونه کې کار کوم، تازه هیله راته پیدا شوې څو وکولای شم راتلونکي کې مالي خپلواکي ترلاسه کړم.»</p>
<p style="text-align: justify;">هغه وايي، اړتیا ده چې ښځو ته د کار زمینه برابره شي، سړي او ښځې وکولای شي د یوبل ترڅنګ د کورنیو او هېواد په اقتصادي پياوړتیا کې برخه واخلي.</p>
<p style="text-align: justify;">بلخوا، د سرپل د صنعت او سوداګرۍ رییس مفتي عبدالشاکر شیرینيپزۍ یادې کارخونې له جوړېدو هرکلی وکړ او ویې ویل چې شته امکاناتو ته په کتو به له دې کارخونې ملاتړ وکړي.</p>
<p style="text-align: justify;">هغه زیاته کړه چې دا مهال په سرپل کې د ټغر اوبدنې، ګلدوزۍ، خیاطۍ او نورو ۱۸۰ کارخونو کې ۱۲۰۰ ښځې پر کار بوختې دي.</p>
