<p style="text-align: justify;">مزارشریف (پژواک، ۱۴ غبرګولی ۱۴۰۳): د ازبکستان له خوا افغان سوداګرو ته د اوسپنې پټلۍ تعرفې له کمېدو سره سم د بلخ یو شمېر سوداګرو له سرپرست حکومته هم غوښتي چې د صادراتو برخه کې ګمرکي او ترانسپورټي تعرفې کمې کړي.</p>
<p style="text-align: justify;">دغه سوداګر د ازبکستان له هغې پرېکړې د خوښۍ په څرګندولو چې د اوسپنې پټلۍ ترانسپورټي تعرفه یې ۵۰ سلنه ټیټه کړې، وایي چې دغه ګام د دواړو هېوادونو ترمنځ د سوداګریزو اړیکو د پراختیا او د وارداتو او صادراتو زیاتوالي لپاره مناسب فرصت برابرولی شي.</p>
<p style="text-align: justify;">د بلخ یوه سوداګر مصطفی مومند پژواک خبري اژانس ته وویل چې د ازبکستان له لوري د تعرفو کمول د افغان سوداګرو لپاره یو ستر ملاتړ دی او له سرپرست حکومته هم غواړي چې د صادراتو برخه کې ګمرکي او ترانسپورټي تعرفې کمې کړي.</p>
<p style="text-align: justify;">دغه سوداګر د حکومت له لوري د لا ډېرو اسانتياوو پر رامنځته کولو ټينګار کوي او وايي: «يو سوداګر د خپل مال د لېږد لپاره اورګاډي ته اړتيا لري؛ ځکه چې لږ لګښت لري، موږ د اسلامي امارت له حکومته غوښتنه کوو چې د دغو سوداګرو ملاتړ او تشویق دې وکړي چې لا ډېرو پانګونو ته زړه ښه کړي.»</p>
<p style="text-align: justify;">زبیر ثنازاده یو بل سوداګر هم وایي، که چېرې ازبکستان افغان سوداګرو ته تخفیف ورکوي نو د افغانستان سرپرست حکومت ته هم په کار ده چې د سوداګرو د تشویق په موخه د دوی ترانسپورټي او ګمرکي تعرفو کې کموالی راولي.</p>
<p style="text-align: justify;">ورته وخت کې د ازبکستان سرخاندریا اوسپنې پټلۍ مسوولین پژواک خبري اژانس ته د دغه هېواد د اورګاډي له لارې د سوداګریزو توکو لېږدولو په لګښت کې د ۵۰ سلنه کمېدو خبر ورکوي.</p>
<p style="text-align: justify;">د سرخاندریا اوسپنې پټلۍ رییس فرهاد وویل: «د حیرتان د دوستۍ پله له لارې د باروړونکو موټرو لپاره چې ۴۰ ټنه وزن لري، ۲۰۰ ډالره او د ۲۰ ټنه واګون په بدل کې ۱۰۰ ډالره اخیستل کېدل، خو اوس دغه لګښتونه نشته او د اوسپنۍ پټلۍ کمرګي تعرفه هم کمه شوې ده.»</p>
<p style="text-align: justify;">هغه دغه راز زیاته کړه، هېواد یې غواړي له افغان سوداګرو سره په هره برخه کې مرسته وکړي، څو له دغه هېواد سره سوداګریزې اړیکې لا پیاوړې کړي.</p>
<p style="text-align: justify;">بلخوا بلخ د اوسپنې پټلۍ مسوولین وايي، هڅه کوي افغان سوداګرو ته د سیمې هېوادونو ترمنځ د منظمې سوداګرۍ د دوام په موخه نورې اسانتیاوې هم برابرې کړي.</p>
<p style="text-align: justify;">د بلخ اوسپنۍ پټلۍ رییس محمدشفیق محمود وایي چې د دغه ولایت اوسپنې پټلۍ کرښې ۲۴ ساعته د وارداتو، صادراتو او ترانزیټ لپاره چمتو دي او هڅه کوي په ټولو برخو کې سوداګرو ته لا ډېرې اسانتیاوې برابرې کړي.</p>
<p style="text-align: justify;">د افغانستان د سوداګرۍ او پانګونې خونې مسوولینو هم د ازبکستان له لوري د سوداګریزو توکو پر لېږد رالېږد د تعرفې کمېدو هرکلی کړی دی.</p>
<p style="text-align: justify;">د افغانستان د سوداګرۍ او پانګونې خونې چارواکي وايي، دغه ګام کولای شي د افغانستان د صادراتو او وارداتو د بهیر ښهوالي او د سوداګرۍ د ودې ترڅنګ په سیمه کې پر ځانګړو ترانزیټي لارو د افغانستان اتکا کمه کړي.</p>
