<p style="text-align: justify;">پلخمري (پژواک، ۱۲ وږی ۱۴۰۳): بغلان کې سیمهییز مسوولین وايي چې په داخل او بهر کې یو شمېر افغان سوداګر د دغه ولایت د بورکې ولسوالۍ سېلابځپلو ته لسګونه کورونه جوړوي.</p>
<p style="text-align: justify;">د بغلان د والي ویاند ملا علم مجیدي پژواک خبري اژانس ته وویل، د بورکې ولسوالۍ د فلول او شرشر سیمو ۳۳۰ سېلابځپلو کورنیو ته د استوګنې معیاري کورونه جوړوي خو په لومړي پړاو کې به یوازې د څلوېښتو کورونو جوړولو چارې پیل شي.</p>
<p style="text-align: justify;">هغه زیاته کړه، د دغه ولایت والي وړمه ورځ د بورکې ولسوالۍ یادو سیمو ته سفر وکړ او د کورونو لپاره یې ځمکې مشخصې کړې.</p>
<p style="text-align: justify;">د مجیدي په خبره، دغه څلوېښت کورونه په بهر کې د مېشت یوه افغان سوداګر په مالي لګښت جوړېږي او د پاتې نورو کورونو جوړولو په موخه ورسره د یو شمېر نورو ملي سوداګرو له لوري د مرستو ژمنې شوې دي.</p>
<p style="text-align: justify;">ورته مهال، یو شمېر هغه کورنۍ چې تېرو سېلابونو بېکوره کړې، د دغو کورونو جوړېدو ته خوښ او هیلهمن دي، خو غوښتنه کوي چې د ژمي له رارسېدو مخکې باید جوړ او دوی ته وسپارل شي.</p>
<p style="text-align: justify;">د یادې سیمې یو اوسېدونکی عتیقالله وايي، درې ورځې کېږي چې په سېلابونو کې ویجاړ شوي کلي ته څېرمه پر یوه لوړه ساحه د کورونو جوړولو لپاره ځمکه هواره شوې ده.</p>
<p style="text-align: justify;">هغه وایي، سلګونه بېکوره شوې کورنۍ لا هم په خېمو کې ژوند کوي او که له ژمي مخکې یې کورونه جوړ نه شي، په خېمو کې د ژمي د یخې هوا تېرول به ورته سخت تمام شي؛ ځکه سیمه یې غرنۍ او هوا یې سړه ده.</p>
<p style="text-align: justify;">د یادونې ده، بغلان کې شاوخوا درې میاشتې مخکې سېلابونو زرګونه کورنۍ بېکوره کړې، میلیونونه افغانۍ مالي زیان یې واړاوه او سلګونه کسان یې مړه یا ټپیان کړل.</p>
