<p style="text-align: justify;">نیلي (پژواک، ۱۲ تله ۱۴۰۳): دایکنډي کې مسوولین وايي چې د دغه ولایت په مرکز کې د ۱۳ ټیمونو په ګډون د «کلي جام» په نوم د فوټسال ټورنمنټ پیل شو.</p>
<p style="text-align: justify;">د دایکندي د فوټبال فدراسیون رییس نصرالله وفا پژواک خبري اژانس ته وویل چې د «کلي جام» په نوم د فوټسال ټورنمټ پرون د دغه ولایت په کچه د ۱۳ ټیمونو په ګډون د «کليغږ» راډیو له لوري د دایکنډي د بدني روزنې امریت او فوټبال فدراسیون په همغږۍ د نیلي ښار په ورزشي لوبغاړي کې پیل شو.</p>
<p style="text-align: justify;">هغه زیاته کړه چې دغه ټورنمنټ د فوټسال لوبې د ودې، یووالي او له نشهیي توکو د ځوانانو د لرې ساتلو په موخه جوړ شوی دی.</p>
<p style="text-align: justify;">بلخوا، د دایکنډي د بدني روزنې او ورزش امر ناصر حقیقت د دغه ټورنمنټ د پیل مراسمو کې وویل چې دې ادارې تل له ورزش او وزرشکارانو ملاتړ کړی دی.</p>
<p style="text-align: justify;">یاد ټورنمنټ د دوو لوبو په ترسره کولو سره پیل شو؛ لومړۍ لوبه د «توفان دشت» او «جهش اشترلي» ترمنځ او دویمه د «میوند نیلي» او «جوانان توفان مرکز» لوبډلو ترمنځ وشوه.</p>
<p style="text-align: justify;">په همدې حال کې، یو شمېر ورزشکارانو د دې لوبو پیلېدو هرکلی وکړ او دغه ډول ټورنمنټونه یې د ورزش د ودې لپاره اغېزناک وبلل.</p>
