<p style="text-align: justify;">جلالاباد (پژواک، ۲۳ تله ۱۴۰۳): د ننګرهار ولايت مرکز جلالاباد ښار يو شمېر اوسېدونکي او موټرچلوونکي د ګڼې ګوڼي د کمېدو لپاره د ترافيکي اشارو د فعالېدو غوښتنه کوي.</p>
<p style="text-align: justify;">ښاريان وايي، په ژمي کې جلالاباد ښار کې د اوسېدونکو شمېر ډېرېږي او له بې خوا د رېکشاوو موجوديت هم د دې سبب شوی چې له دې وروسته د پسرلي تر راتګ پورې په ښار کې ګڼه ګوڼه زياته وي.</p>
<p style="text-align: justify;">د ښاريانو په وينا، د ترافيکي اشارو فعالېدل يوازينۍ لاره ده چې په ښار کې ګڼه ګوڼه کنټرول شي او د تګ راتګ پر مهال خلک له ستونزو خلاص شي.</p>
<p style="text-align: justify;">د ترافيکو مديريت چارواکي وايي، د ښار مختلفو واټونو او څلورلارو کې ترافيکي اشارې موجودې دي خو د ځينو تخنيکي ستونزو له امله غیرفعالې دي او هڅه کېږي چې نږدې وختونو کې فعالې شي.</p>
<p style="text-align: justify;">د جلالاباد ښار د اتمې ناحیې اوسېدونکي دوران منګل پژواک ته وویل، ښار کې ورځ تر بلې ګڼه ګوڼه زياتېږي او بايد د ستونزې د حل لپاره ترافيکي اشارې فعالې شي.</p>
<p style="text-align: justify;">دی وايي: «په دغو اشارو باندې ډېر مصرف شوی دی، ډېره انرژي پرې مصرف شوې، خو دا ډېر وخت کېږي چې غیر فعال دي، اوس يې ضرورت هم دی، بايد فعالې شي.»</p>
<p style="text-align: justify;">د خیرالله په نوم د جلالاباد ښار يو بل اوسېدونکی هم غوښتنه کوي چې بايد په ښار کې ترافيکي اشارې فعالې شي څو ګوڼه ګوڼه ورسره کمه شي.</p>
<p style="text-align: justify;">جلالاباد ښار کې د يوه ټکسي موټر چلوونکي عزتالله پژواک ته وویل چې په ښار کې ګڼه ګوڼه ډېره زياته شوې، که ترافيکي اشارې فعالې شي نو ګڼه ګوڼه ورسره ډېره کمېدلی شي.</p>
<p style="text-align: justify;">هغه وويل: «دغه ترافيکي اشارې غیر فعاله دي، ډېر کله د ترافيکي اشارو د نه موجوديت له امله ټکرې رامنځته کېږي، ساعتونه ساعتونه ګڼه ګوڼه جوړه وي او خلک له کارونو پاتې کېږي.»</p>
<p style="text-align: justify;">بل لورته، د ننګرهار ترافيکو مدیريت چارواکي وايي، په ښار کې ترافيکي اشارې شته خو د ځينو تخنيکي ستونزو له امله غیرفعالې شوې دي.</p>
<p style="text-align: justify;">د ترافيکو مديريت د تاسیساتو او تعلیماتو امر لومړي څارن عطاءالله عمر پژواک خبري اژانس ته وويل، له تخنيکي ادارو سره يې د ترافيکي اشارو د فعالولو لپاره خبرې روانې کړې دي او ډېر ژر به ښار کې ترافيکي اشارې فعالې شي.</p>
<p style="text-align: justify;">نوموړي زياته کړه: «موږ له شرکت او ریاست سره په تماس کې يو، زموږ پايې نصب دي، زموږ يو څو د برېښنا ميټرونه پاتې دي او موږ ته يې تسليمي پاتې ده، نو چې د تسليمي لپاره يې وعده کړې نو ډېر نږدې وخت کې به ګټې اخیستنې ته چمتو شي.»</p>
<p style="text-align: justify;">دی له موټرچلوونکو غوښتنه کوي چې دومره زيار سره دغه اشارې فعالېږي نو بیا يې بايد ټول موټر چلوونکي مراعت کړي او د ګڼې ګوڼې په مخنيوي کې هم همکاري وکړي.</p>
<p style="text-align: justify;">د يادونې ده، په جلالاباد ښار کې څو ځلې ترافيکي اشارې فعالې شوي خو له لږ دوام وروسته بېرته له فعاليت پاتې کېږي چې اوس هم د ښار ډېرو برخو کې پخوانۍ اشارې غیرفعالې دي.</p>
