متقي له ایرانه د افغان بندیانو په انتقال کې د همکارۍ غوښتنه وکړه

<p style="text-align: justify;">کابل (پژواک، ۲۵ لړم ۱۴۰۳): د افغانستان بهرنیو چارو وزارت سرپرست له ایراني پلاوي سره په لیدنه کې د افغان کډوالو کوربه‌توب له امله له ایرانه د مننې کولو ترڅنګ ویلي چې دغه هېواد دې د افغان بندیانو په انتقال کې هراړخیزه همکاري وکړي.</p>

<p style="text-align: justify;">د بهرنیو چارو وزارت مرستیال ویاند حافظ ضیااحمد تکل نن پر خپله <strong><a href="https://x.com/HafizZiaAhmad">اېکس‌پاڼه</a> </strong>لیکلي چې د دغه وزارت سرپرست مولوي امیرخان متقي د ایران د عدلیې وزارت له مرستیال وزیر دکتور عسکر جلالیان او مل پلاوي سره په خپل دفتر کې وکتل.</p>

<p style="text-align: justify;">سرچینه کاږي چې په دې ناسته کې پر دوه اړخیزو سوداګریزو او اقتصادي اړیکو، په ایران کې د افغان کډوالو او بندیانو او سیمه‌ییزو سیاسي همکاریو په اړه خبرې وشوې.</p>

<p style="text-align: justify;">د افغانستان بهرنیو چارو سرپرست وزیر امیرخان متقي په دې ناست کې له څلورو لسیزو راهیسې د افغان کډوالو کوربه‌توب له امله له ایرانه د مننې کولو ترڅنگ ویلي چې دغه هېواد دې له یادو کډوالو سره ښه تعامل او حوصله ولري.</p>

<p style="text-align: justify;">هغه دغه راز زیاته کړې چې اسلامي امارت د افغان بندیانو د استرداد برخه کې د ایران له حکومت سره ګډ کار ته ژمن دی او په دې اړه یې د دغه هېواد د عدلیې وزارت له مرستیاله غوښتنه وکړه چې د افغان بندیانو په انتقال کې هر اړخیزه همکاري وکړي.</p>

<p style="text-align: justify;">دغه راز، د ایران د عدلیې وزارت مرستیال دکتور عسکر جلالیان ویلي چې هېواد یې د افغانستان پر وروستیو پرمختګونو او ثبات خوشاله دی.</p>

<p style="text-align: justify;">هغه زیاته کړې چې افغانستان ته په سفر کې یې د دغه هېواد له بېلابېلو ادارو سره ډېر ښه او مثبت مجالس وکړل او زیاتوي چې هېواد به یې د خپلو همکاریو په دوام په نږدې راتلونکي کې د ترسره شوو توافقاتو پر اساس د افغان بندیانو د انتقال پروسه عملاً پیل کړي.</p>

<p style="text-align: justify;">د نوموړي په خبره چې د افغان بندیانو د انتقال برخه کې به د افغانستان له اسلامي امارت سره لازمه همکاري وکړي.</p>