مهترلام (پژواک، ۷ سلواغه ۱۴۰۳): د لغمان امنیه قومانداني وايي چې په تېرو شپږو میاشتو کې یې د نشهيي توکو ۴۵۲ روږدي راټول کړي او د درملنې په موخه یې د کابل د روږدو درملنې مرکز ته لېږدولي دي.
د لغمان امنیې قوماندانۍ ویاند یونس یوسفزي پژواک خبري اژانس ته وویل، په تېرو شپږو میاشتو کې یې د مرکز مهترلام په ګډون له پنځهګونو ولسواليو ۴۵۲ روږدي راټول کړي او د درملنې په موخه یې کابل کې د روږدو درملنې مرکز ته لېږدولي دي.
ورته مهال، هغه کورنۍ چې غړي یې روږدي وو او اوس یې درملنه کېږي، خوښې دي.
د الیشنګ ولسوالۍ یوه اوسېدونکي جانالله وویل، د خور خاوند یې په نشه روږدی و، خو کله چې ونیول شو او د درملنې په موخه په روغتون کې بستر شو، اوس یې وضیعت ښه دی او له نشې یې زړه صبر شوی دی.
د مهترلام ښار د سه صدې سیمې اوسېدونکي لعلاغا وویل، د طیبالله په نوم ورور یې چې په نشهيي توکو روږدی و، پوره یو کال په کابل کې د روږدو درملنې مرکز کې بستر شو چې اوس له نشو راګرځېدلی او په یاد روغتون کې د خیاط په توګه دنده ترسره کوي.
دغه راز، د الینګار ولسوالي د شخطرې سیمې اوسېدونکي صاحبالله وویل، خوښ دی چې په کابل کې له دوه میاشتنۍ درملنې وروسته له نشې راګرځېدلی او بېرته یې خپل عادي ژوند پیل کړی دی.
هغه وویل: «له ننه نهه کاله وړاندې د ملګرو له خوا په مختلفو نشهیي توکو روږدی شوم چې په خپل کور او کلي کې مې عزت له لاسه ورکړی و، خو اوس بېرته خدای پاک راباندې رحم وکړ، له هر ډول نشې مې زړه تور شوی دی.»
دی له حکومته غواړي چې پر نشهیي توکو د روږدو درملنې دغه لړۍ روانه وساتي څو ټولنه له دې بدمرغۍ خلاصه شي.
د یادونې ده، واک ته د اسلامي امارت له بیا ځل رسېدو سره په هېواد کې پر نشهيي توکو د روږدو کسانو ټولولو او درملنې لړۍ پیل شوې چې تر دې مهاله په بېلابېلو روغتونونو کې د زرګونو کسانو درملنه شوې ده.
