لوګر کې د فوټبال سیالۍ د «شاهین» لوبډلې په اتلولۍ پای ‌ته ورسېدې

پل‌علم (پژواک، ۱۰ غويی ۱۴۰۴): د لوګر د بدني روزنې او ورزش امریت مسوؤلین وایي چې د ولایت په کچه د لس لوبډلو ترمنځ درې ورځنۍ د فوټبال سیالۍ ترسره شوې چې پای‌لوبه یې شاهین لوبډلې وګټله.

د بدني روزنې او ورزش امریت رییس انجنیر مزمل نعیم‌زي پژواک خبري اژانس ته وویل، د المپیک عمومي کمېټې په همکارۍ پل‌علم ښار کې د ولایت په کچه د لس غوره لوبډلو ترمنځ درې ورځنۍ د فوټبال سیالۍ ترسره شوې.

هغه زیاته کړه، د دغه سیالیو پای‌لوبې ته شاهین او کلنګار لوبډلو لاره موندله وه چې شاهین لوبډلې وکولای شول خپلې سیالې لوبډلې ته ماته ورکړي او بریا خپله کړي.

نوموړي زیاته کړه، د فوټبال یادو سیالیو له جوړېدو څخه موخه د ولایت په کچه فوټبال ورزش ته پراختیا ورکول، د ورزشکارانو ترمنځ د تجربو شریکول او د فوټبال غوره لوبغاړو پېژندل وو.

هغه وویل، هڅه کوي لوګر کې د ولایتونو په کچه د فوټبال ورته سیالۍ جوړې کړي.

د دغو سیالیو یوه لوبغاړي صدیق‌الله پژواک ته وویل، دا ډول سیالۍ کولای شي چې د ورزشکارانو د ظرفیت کچه لوړه کړي.

نوموړي د المپیک عمومي کمېټې له مسؤولینو وغوښتل چې لوګر ولایت کې د فوټبال ورزشکارانو ته د ظرفیت لوړونې سربېره د وسایلو برخه کې هم اسانتیاوې رامنځته کړي.

هېره دې نه وي چې تېره اونۍ هم د لوګر ولایت په کوربه‌توب د سوېل‌ختیځ زون پنځو ولایتونو ترمنځ د رزمي لوبو سیالۍ جوړې شوې وې.