<p style="text-align: justify;">کابل (پژواک، ۱۵ غبرګولی ۱۴۰۴): د بهرنیو چارو وزارت سرپرست د یوناما له مشرې غوښتي چې په خپلو راپورونو کې پر واقعیتونو تمرکز وکړي او زیاته کړې یې ده چې په اروپا کې د مېشتو افغانانو ستونزو ته د رسېدنې لپاره دې د افغان حکومت لاسرسی ممکن شي.</p>
<p style="text-align: justify;">د بهرنیو چارو وزارت خبرپاڼه کې راغلي چې د دغه وزارت سرپرست مولوي امیرخان متقي د ملګرو ملتونو د سرمنشي له ځانګړې استازې او په افغانستان کې د یوناما له مشرې اغلې روزا اوتونبایوا سره وکتل.</p>
<p style="text-align: justify;">خبرپاڼه کې راغلي، په دې کتنه کې دواړو لورو د راستنېدونکو کډوالو پر اړتیاوو، د نړۍ په ګوټ ګوټ کې د مېشتو افغانانو پر ستونزو، په هېواد کې د راغلو پرمختګونو، د خصوصي سکټور پر ودې، د پانګونې پر جلب او یو شمېر نورو موضوعاتو خبرې وکړې.</p>
<p style="text-align: justify;">متقي ویلي، په اروپا کې د مېشتو افغانانو ستونزو ته دې د افغان حکومت لاسرسی ممکن شي څو د قونسلي خدماتو په وړاندې کولو سره د هغوی حقوقي موضوعات حل او له بشري حقونو یې دفاع وشي.</p>
<p style="text-align: justify;">متقي دغه راز له یوناما غوښتي چي په خپلو راپورونو کې پر واقعیتونو تمرکز وکړي څو په هېواد کې شوي پرمختګونو او هر اړخیز ثبات له نړۍوالو سره شریک شي.</p>
<p style="text-align: justify;">اوتونبایوا هم ویلي چې ملګري ملتونه د افغانانو ترڅنګ ولاړ دي.</p>
<p style="text-align: justify;">هغې زیاته کړې، یوناما هڅه کوي چې راستنېدونکو کډوالو ته د ژوند اسانتیاوو ترڅنګ په افغانستان کې د کاري فرصتونو رامنځته کېدو لپاره د پانګونې جلب ته زمینه برابره کړي.</p>
<p style="text-align: justify;">د هغې په خبره چې له افغانستان سره د نړۍوالو مرستې د بشري برخې ترڅنګ انکشافي برخو ته هم غځېدلې دي.</p>
<p style="text-align: justify;">د یوناما مشرې ژمنه کړې چې د ملګرو ملتونو او امنیت شورا په راتلونکو غونډو کې به له نړۍوالو سره په افغانستان کې د شوو پرمختګونو او فرصتونو په تړاو معلومات شریکوي او د افغان حکومت پیغامونه به لېږدوي.</p>
<p style="text-align: justify;">بهرنیو چارو وزارت لیکلي، د ناستې په پای کې د افغانستان اسلامي امارت او یوناما ترمنځ پر نږدې او ګډ کار ټینګار وشو.</p>
