افغانستان او پاکستان د وحشي ژوو د قاچاق د مخنیوي په موخه ګډه کمیټه جوړوي

کابل (پژواک، ۱۶ غبرګولي ۱۴۰۴): افغان او پاکستاني چارواکو د وحشي ژوو د قاچاق پر وړاندې پر ګډې مبارزې ټینګار کړی او هوکړه یې کړې چې په دې برخه کې به د دواړو هېوادونو یوه ګډه کمېټه جوړه کړي.

د افغانستان د چاپېریال ساتنې ملي ادارې په خبرپاڼه کې راغلي چې د دې ادارې مشر مولوي مطیع‌الحق خالص او ورسره پلاوي د قرغیزستان په پلازمېنه بیشکک کې د واورین پړانګ د ساتنې (GSLEP) عمومي کنفرانس په څنډه کې د پاکستان د اقلیم بدلون او چاپېریال ساتنې له وزیرې شزرا منصب علي خان سره وکتل.

خبرپاڼه کې راغلي، په دې لیدنه کې دواړو لورو د وحشي ژوو او حیواناتو د ناقانونه قاچاق پر وړاندې د ګډې مبارزې هوکړه وکړه او پرېکړه یې وکړه چې په دې برخه کې به یوه ګډه کمېټه جوړه کړي.

سرچېنې زیاته کړې، یاده کمیټه به د ناقانونه ښکار او قاچاق د مخنیوي ترڅنګ د نړۍوالو صندوقونو او چاپېریالي پروژو د جذب او همغږۍ په برخه کې هم فعالیت کوي.

خبرپاڼه زیاتوي، د ناستې یوه بله مهمه موضوع د اقلیم بدلون و چې دواړو لورو د ګډو اقلیمي ستونزو د حل لپاره پر همکارۍ ټینګار وکړ.

د چاپېریال ساتنې ملي ادارې لیکلي، هغوی ژمنه وکړه چې د اقلیمي بدلون پر وړاندې به ګډ ګامونه پورته کوي او د سیمې په کچه به د ګډو چاپېریالي هڅو ملاتړ ته دوام ورکوي.