<p dir="rtl" style="text-align: justify;">غزني ښار (پژواک، ۱۱ زمری ۱۴۰۴): د غزني سیمهییز مسوولین وایي، د ۱۹ میلیون افغانیو په ارزښت د دغه ولایت د خوګیاڼي ولسوالۍ لپاره د نوې اداري ودانۍ د جوړولو چارې پیل شوې.</p>
<p dir="rtl" style="text-align: justify;">د غزني د والي ویاند، مولوي عزتالله سعیدي نن په دې اړه جوړه شوې غونډه کې وویل چې دغه ودانۍ به په درېیو پوړونو کې جوړه شي او ۲۴ اداري خونې به ولري.</p>
<p dir="rtl" style="text-align: justify;">نوموړي زیاته کړه، یاده ودانۍ به د کورنیو چارو وزارت د تعمیراتو عمومي ریاست له خوا، د ۱۹ میلیونه افغانیو په لګښت، د یوه داخلي شرکت له لوري جوړه شي.</p>
<p dir="rtl" style="text-align: justify;">سعیدي وویل، چې د دې ودانۍ د جوړېدو چاري به په ۹ میاشتو کې بشپړې شي، او د جوړېدو په صورت کې به د یادې ولسوالۍ اداري ستونزې حل شي.</p>
<p dir="rtl" style="text-align: justify;">په ورته وخت کې، د سیمې اوسېدونکي او دولتي مامورین د دې ودانۍ د جوړېدو له امله خوښي څرګندوي او وایي چې تر دې وړاندې یې ولسوالۍ ته ځانګړې اداري ودانۍ نه لرله، چې له امله به یې د دولتي کارونو پر مهال له ګڼو ستونزو سره مخامخ وو.</p>
<p dir="rtl" style="text-align: justify;">یاده دې وي، چې د مسوولینو په وینا، د غزني ولایت ډېرې ولسوالۍ لا هم ځانګړې اداري ودانۍ نه لري، چې د خلکو او دولتي مامورینو لپاره د خدمتونو پر وړاندې کولو منفي اغېز کوي.</p>
