<p style="text-align: justify;"><strong> </strong>کابل (پژواک، ۲۲ تله ۱۴۰۴): د افغانستان د بهرنیو چارو وزیر د هند له یو شمېر سوداګرو او صنعتکارانو سره په یوه غونډه کې چې د دغه هېواد د پارلمان د غړي او مشهور سوداګر ویکرامجیت په مشرۍ جوړه شوې وه، ویلي چې د کابل – امریتسر الوتنې به بېرته پیل شي.</p>
<p style="text-align: justify;">تایمز اف انډیا <strong><a href="https://timesofindia.indiatimes.com/city/chandigarh/amritsar-kabul-flights-to-resume-afghan-minister-amir-khan-muttaqi/articleshow/124535227.cms">راپور</a> </strong>ورکړی چې دا ناسته پرون د هند د سوداګرۍ او صنایعو خونې فدراسیون (FICCI) له لورې په نوي ډیلي کې جوړه شوې وه.</p>
<p style="text-align: justify;">راپور کې راغلي چې دې اقدام د افغانستان او هندوستان ترمنځ د اقتصادي او فرهنګي اړیکو د احیا کولو لپاره نوې هیلې رامنځته کړي؛ هغه اړیکې چې له څو کلونو راهیسې د جیوپوليټیکي بدلونونو له امله محدودې شوې وې.</p>
<p style="text-align: justify;">د هند په پارلمان کې د پنجاب استازي ویکرامجیت سنګ پر خپله <strong><a href="https://x.com/vikramsahney/status/1977758521450963104">ایکسپاڼه</a> </strong>لیکلي، د افغانستان بهرنیو چارو له وزیر مولوي امیرخان متقي سره یې ډېرې ګټورې خبرې اترې درلودې او په دغو خبرو کې د افغانستان او هند ترمنځ د سوداګرۍ د پیاوړتیا او په سیمه کې د سولې او هوساینې رامنځته کېدو په موخه د خلکو ترمنځ د اړیکو د پراختیا په اړه بحث شامل و.</p>
<p style="text-align: justify;">هغه لیکلي: «ما د امریتسر او کابل او کندهار ترمنځ د مستقیمو الوتنو د بیا پيلېدو له وړاندیز څخه تود هرکلی وکړ او د سوداګریزو لارو د بیارغونې او د روغتیا، زدهکړو او ګرځندویئ برخو کې د همکارۍ د پراختیا پر اهمیت مې ټینګار وکړ.»</p>
<p style="text-align: justify;">نوموړی وايي، باور لري چې د افغانستان او هندوستان ترمنځ باثباته او رغنده اقتصادي اړیکې به د دواړو هېوادونو د خلکو لپاره د ګډې هوساینې او نوې هیلې لامل شي.</p>
<p style="text-align: justify;">تایمز اف انډیا لیکي، په امریتسر ښار د دغه خبر تود هرکلی وشو؛ هغه ښار چې یو وخت د افغان سوداګرو د سوداګرۍ اصلي مرکز و.</p>
<p style="text-align: justify;">ساچین کمار چې د «ایرلاینز» هوټل مالک دی، د دغه ښار د تېرو ښو ورځو او شرایطو یادونه وکړه او و یې ویل چې افغان سوداګر به دلته په اونیو اونیو پاتې وو او دا چاره د سوداګرۍ او ګرځندوۍ د غوړېدو لامل شوې وه.</p>
<p style="text-align: justify;">هغه ویلي چې افغان سوداګر به معمولا څه باندې یوه میاشت دلته پاتې کېدل او د دغو الوتنو بېرته پيلېدل نه یوازې سوداګریز فعالیتونه زیاتوي، بلکې د ګرځندوی صنعت به هم چې د پام وړ پیکه شوی و، بېرته راژوندی کړي</p>
