<p style="text-align: justify;">میدانښار (پژواک، ۱۷ لړم ۱۴۰۴): د میدانوردګو ولایت د بدني روزنې او ورزش امریت وايي چې د دغه ولایت په مرکز میدانښار کې د ۶۰ ورزشکارانو ترمنځ د پهلوانۍ تشویقي سیالۍ ترسره شوې.</p>
<p style="text-align: justify;">د میدانوردګو د بدني روزنې او سپورت امر ذبیحالله وهاج پژواک خبري اژانس ته وویل چې د پهلوانۍ ورزشي څانګې د پنځو لوبډلو - اتحاد تکانه، جلریز زیبا، علي مولا، ستاره تکانه او جلریز ځوانانو - ترمنځ سیالۍ ترسره شوې.</p>
<p style="text-align: justify;">هغه وویل چې په یادو سیالیو کې ۶۰ ورزشکارانو په درېیو کټګوریو (کوچنایانو، ځوانانو او لویانو) ګډون کړی وو.</p>
<p style="text-align: justify;">نوموړي وویل، په پای کې اتحاد تکانه د ۹ طلایي مډالونو په ګټلو سره لومړی مقام او ستاره تکانه د ۶ طلایي مډالونو په ګټلو سره دویم مقام ترلاسه کړ او په پای کې مډالونه او ستاینلیکونه هم ورکړل شول.</p>
<p style="text-align: justify;">هغه زیاته کړه چې د یادو سیالیو موخه د ولایت په کچه د لوبغاړو هڅول او ورزش ته وده ورکول وو.</p>
<p style="text-align: justify;">په ورته مهال، په یادو سیالیو کې ګډون کوونکي ورزشکاران هم خوښ وو او وايي چې دوی له اړوندو ادارو غواړي چې دې لوبو ته زیاته پاملرنه وکړي.</p>
<p style="text-align: justify;">د جلریز زیبا لوبډلې یوه ورزشکار وحدت، پژواک ته وویل: «دا سیالۍ ډېرې عالي وې، زه ډېر خوشحاله یم چې برخه مې په کې اخیستې وه. له حکومت مې غوښتنه ده چې دې سیالیو ته نوره هم پاملرنه زیاته کړي.»</p>
