کابل (پژواک، ۲۶غبرګولی ۱۴۰۵): د ۲۰۲۶ کال د فوټبال نړۍوال جام سیالیو په لړ کې فرانسې سنګال، ناروې عراق او ارجنټاین الجزایر ته ماته ورکړه.
د ۲۰۲۶ کال نړۍوال جام سیالۍ د امریکا، کاناډا او مکسیکو په کوربهتوب روانې دي.
د راپورونو له مخې، د فوټبال نړۍوال جام سیالیو په دوام تېره شپه د فرانسې او سنګال، ناروې او عراق او ارجنټاین او الجزایر ترمنځ لوبې ترسره شوې.
په دغو سیالیو کې یوه لوبه د فرانسې او سنګال لوبډلو ترمنځ ترسره شوه چې ۳ پر ۱ فرانسې وګټله.
په دې لوبه کې د فرانسې لپاره لوبډلمشر کیلیان امباپه دوه او برډلي بارکولا یو ګولونه ووهل.
دغهراز، په نړۍوال جام کې بیا بله لوبه د ناروې او عراق لوبډلو ترمنځ وه چې ۴ پر ۱ ناروې وګټله.
په دې لوبه کې ارلینګ هالنډ د ناروې لپاره دوه ګولونه وکړل او بل ګول بیا لیو اوسټیګارډ وواهه.
د عراق لوبډلې لپاره یوازېنې ګول ایمن حسین وواهه.
په یادو سیالیو کې بله لوبه د ارجنټاین او الجزایر ترمنځ ترسره شوه چې درې پر صفر ارجنټاین وګټله.
په یاده لوبه کې د ارجنټاین لپاره لیونل مسي درې ګولونه په ۱۷مه، ۶۰مه او ۷۶ دقیقو کې ووهل او د ګولونو «هیټریک» یې وکړ.
