کابل (پژواک، ۲۷ چنګاښ ۱۴۰۵): روسي چارواکي وایي، د دغه هېواد پر څو سیمو د اوکراین د بېپیلوټه الوتکو په بریدونو کې لږ تر لږه اووه کسان وژل شوي او ۵۱ نور ټپیان دي.
اسوشیټډپرېس خبري اژانس نن (شنبه، د چنګاښ ۲۷مه) راپور ورکړی چې د انلاین پلور «وایلدبریس» شرکت دوه لوی ګودامونه د تامبوف سیمې په کوتوفسک ښار او مسکو ته څېرمه په الکتروستال ښار کې د اوکرایني بېپیلوټه الوتکو تر بریدونو لاندې راغلي دي.
د تامبوف والي یوګني پرویشوف ویلي، په کوتوفسک ښار کې پر ګودام د برید له امله اووه کارکوونکي وژل شوي او ۲۵ نور ټپیان دي.
هغه زیاته کړې چې پر الکتروستال د برید له امله ۲۴ نور کسان هم ټپیان شوي دي.
د روسي چارواکو په وینا، د نوګینسک ښار پر یوه نفتي زېرمتون د بېپیلوټه الوتکو په برید کې هم دوه کسان ټپیان شوي او اورلګېدنه رامنځته شوې ده. د راپور له مخې له برید وروسته، د احتمالي خطرونو د مخنیوي لپاره د پېښې ځای ته نږدې یو زېږنتون او یوه استوګنیزه ودانۍ تخلیه شوي دي.
د اوکراین ولسمشر ولودیمیر زلنسکي ویلي، د دغه هېواد ځواکونو د مسکو او تامبوف په سیمو کې دوه «مهم لوژستیکي تاسیسات» په نښه کړي دي.
هغه ادعا کړې چې له دغو تاسیساتو څخه د هغو تحریم شویو پرزو د لېږد لپاره کار اخیستل کېده چې د بېپیلوټه الوتکو او د مسیرموندنې وسایلو په تولید کې کارول کېږي.
د روسیې دفاع وزارت ویلي، د دغه هېواد هوايي دفاعي سیسټمونو تېره شپه د روسیې پر ۱۹ سیمو، کریمیا ټاپووزمې، ازوف سمندر او تور سمندر ۳۷۹ اوکرایني بېپیلوټه الوتکې شنډې کړې دي.
اوکراین په وروستیو میاشتو کې د روسیې په خاوره کې د انرژۍ پر تاسیساتو، لوژستیکي مرکزونو او پوځي هدفونو خپل اوږدواټن بریدونه زیات کړي دي.
