امریکا پرله‌پسې دیارلسمه شپه په ایران کې پر ځینو موخو هوايي بریدونه کړي

کابل (پژواک، ۲ زمری ۱۴۰۵): نړۍوالو رسنیو راپور ورکړی چې امریکا پرله‌پسې دیارلسمه شپه په ایران کې ځینې موخې په نښه کړې او ورته مهال د هرمز تنګي د کنټرول او سمندري بېړیو د تګ راتګ د امنیت پر سر ترینګلتیا نوره هم ډېره شوې ده.
اسوشیټېډ پرېس راپور ورکړی چې امریکايي ځواکونو پرله‌پسې دیارلسمه شپه په ایران کې پر ځینو اهدافو خپلو هوايي بریدونو ته دوام ورکړی؛ دغه بریدونه د هرمز تنګي د امنیت او په نړۍ کې د انرژۍ د لېږد پر مهمو لارو د تهران او واشنګټن ترمنځ د مخ پر زیاتېدونکو نښتو یوه برخه بلل کېږي.
د راپور له مخې، په تازه بریدونو کې په بندرعباس او قشم ټاپو کې پوځي تاسیسات او ځینې بنسټیزې زېربناوې په نښه شوې دي. دغه بریدونه وروسته له هغه شوي چې د یمن حوثي وسله‌والو، چې امریکا یې د ایران په ملاتړ تورنوي، په سره سمندرګي کې پر دوو سعودي بېړیو د برید مسوولیت ومانه.
اسوشیټېډ پرېس لیکلي چې هرمز تنګی او باب‌المندب د نفتو د لېږد او نړۍوالې سوداګرۍ له مهمو سمندري لارو دي او په دغو سیمو کې د نښتو زیاتېدو د سمندري تګ راتګ د امنیت او انرژۍ د عرضې په اړه اندېښنې زیاتې کړې دي.
د دغو ترینګلتیاوو له امله، په نړۍوال بازار کې د نفتو بیه په هر بېرل کې له ۱۰۰ ډالرو لوړه شوې ده.
په راپور کې راغلي چې د امریکا ولسمشر ډونالډ ټرمپ خبرداری ورکړی چې که د حوثیانو بریدونه دوام وکړي، واشنګټن به لا سخت پوځي اقدامات وکړي. په مقابل کې، ایراني چارواکو دغه ګواښونه غندلي او ټینګار یې کړی چې د امریکا هر ډول اقدام ته به ځواب ورکړي.
همدارنګه، د عراق لومړي وزیر محمد شیاع السوداني تهران ته د خپل سفر پر مهال د ترینګلتیاوو د کمېدو او په سیمه کې د بحران د پراخېدو د مخنیوي لپاره د ډیپلوماتیکې حللارې د موندلو غوښتنه کړې ده.
تر اوسه ایراني رسمي رسنیو داسې کوم راپور نه دی خپور کړی چې «د دیارلسمې شپې د بریدونو په ځواب کې ایران هم په همدې شپه نوی برید کړی دی که نه.»