کابل (پژواک، ۲۲ زمری ۱۴۰۵): د راپورونو له مخې، په غزه کې ډاکټران وايي چې په دې سیمه کې د سرطاني ناروغانو د مړینې کچه د جګړې له پیله د مخکې په پرتله دوه تر درې برابره لوړه شوې؛ ځکه ډېری ناروغان د امکاناتو له نشتوالي او بهر ته د تلو له محدويتونو سره مخ دي.
رویټرز راپور ورکړی چې په غزه کې د سرطان یوازېنی تخصصي روغتون په ۲۰۲۵ کال کې د اسرائیلو له خوا ویجاړ شوی او اوس شاوخوا ۱۷ زره سرطاني ناروغان په دې سیمه کې کیموټراپي او د درملنې نورو اسانتياوو ته لاسرسی نه لري.
په راپور کې د ډاکټرانو له قوله راغلي چې ډېری ناروغان له غزې بهر د درملنې لپاره د سفر مالي توان نه لري او هغه کسان چې د درملنې لپاره بهر تللی شي، هم له غزې څخه د وتلو له محدودیتونو سره مخ دي.
خو هغه اسرائیلي پوځي اداره چې غزې ته د لاسرسي څارنه کوي، ادعا کړې چې د درملنې لپاره د ناروغانو لېږد محدود شوی نه دی؛ خو د هغوی وتل د منونکي هېواد له رسمي غوښتنې او امنیتي ارزونې سره تړاو لري.
دې اسرائیلي ادارې ویلي چې د روان کال په فبرورۍ کې د رفح د پولې له محدودې بیا پرانیستل کېدو راهیسې شاوخوا ۵ زره او ۸۰۰ هغه کسان چې په غزه کې د درملنې اړتیا لري، مصر ته لېږدول شوي دي.
د فلسطین روغتیايي چارواکو ویلي، شاوخوا ۲۰ زره ناروغان چې ۵ زره یې سرطاني دي، له غزې بهر د درملنې لپاره ثبت شوي؛ خو تر اوسه یې د وتلو اجازه نه ده ترلاسه کړې.
رویټرز راپور ورکړی چې د غزې ډېری روغتونونه د جګړې پر مهال ویجاړ یا زیانمن شوي او فعال روغتونونه هم د سرطان د درملنې او تشخیص لپاره د اړینو توکو په ګډون، د طبي وسایلو او نورو اړینو روغتیايي موادو له سخت کمښت سره مخ دي.
د الشفاء روغتون ريیس محمد ابوسلمیه ویلي چې هره ورځ له درېیو تر پنځو پورې سرطاني ناروغان د اړتیا وړ کیموټراپي ته د نه لاسرسي له امله مري.
د هغه په خبره، له جګړې مخکې هره ورځ د سرطاني ناروغانو د مړینې کچه شاوخوا له یوه تر دوو کسانو وه.
