کابل (پژواک، ۱۱ وږی ۱۴۰۵): ایران وایي چې په تازه بریدونو کې یې د بېپیلوټه الوتکو او بالستیک توغندیو په وسیله په متحده عربي اماراتو، بحرین او اردن کې د امریکايي ځواکونو اډې او تأسیسات په نښه کړي دي.
د ایران دولتي خبري اژانس ایرنا نن د دغه هېواد د پوځ له قوله راپور ورکړی چې لسګونو بېپیلوټه الوتکو په متحده عربي اماراتو کې د الظفره او المنهاد اډو راداري سیستمونه او د امریکايي ځواکونو د مېشتېدو ځایونه په نښه کړي دي.
د راپور له مخې، د ایران پوځ دغه راز ویلي چې په بحرین کې د شیخ عیسی اډې راداري تأسیسات او د امریکايي ځواکونو د مېشتېدو ځایونه هم د بېپیلوټه الوتکو په وسیله په نښه شوي دي.
د ایران پوځ ویلي چې دغه بریدونه یې د ایران پر خاوره د امریکا د وروستیو بریدونو په غبرګون کې ترسره کړي دي.
بلخوا، ایرنا د سپاه پاسداران د عامه اړیکو له قوله راپور ورکړی چې د دغه ځواک هوايي ـ فضايي ځواکونو په بالستیک توغندیو په اردن کې د پرنس حسن هوايي اډه کې د امریکا د «آرکیو-۴» او «اېمکیو-۹» بېپیلوټه الوتکو هنګرونه په نښه کړي دي.
سپاه پاسداران ادعا کړې چې په دغه برید کې یو شمېر بېپیلوټه الوتکې له منځه وړل شوې او یو شمېر پیلوټانو او تخنیکي کارکوونکي وژل شوي دي.
امریکايي چارواکو تر اوسه د ایران د دغو بریدونو په اړه څه نه دي ویلي.
