ګردېز (پژواک، ۲ ليندۍ ۹۹): د پکتيا په مرکز ګردېز ښار کې ګازي بخارۍ ناوې او زوم د واده په لومړۍ شپه مړه کړي دي.
دغه پېښه تېره شپه د پکتيا د مرکز ګردېز ښار اړوند د کډوالو په ښارګوټي کې رامنځته شوې ده.
د مړ شوي ځوان ورور مجیب الله پژواک ته وويل چې تېره شپه یې ورور او ورېندار په خونه کې د اوکرینا جاپان په نوم ګازي بخارۍ روښانه کړې وه، خو وروسته یې ساه ورته بنده کړې او دواړه یې مړه کړي دي.
نوموړی وايي: ((د واده اوله شپه یې وه، بخارۍ یې چالانه کړې وه، ساه یې ورته بنده کړې او ګنګس کړي وو. دواړه مړي شوي دي.))
ده نيوکه وکړه چې هېواد ته د بې کيفيته ګازو او بخاريو د واردولو له امله ورته پېښې رامنځته کيږي، بايد اړوند ارګانونه يې د واردولو مخه ونيسي.
په ګردېز ښار کې يو تن ډاکټر ابراهیم وايي چې د ګازي بخارۍ له امله مړینه په خونه کې د اکسیجن د کموالي له امله رامنځته کيږي.
نوموړی له خلکو غواړي چې په دې اړه محتاط واوسي او د ویده کېدو پر مهال ګازي بخارۍ بنده او له خونې څخه يې بهر کړي.
ډاکټر ابراهیم زیاته کړه: ((کله چې د يخې هوا له امله کوټه کې بخارۍ ګل شي، نو ګاز وځي، د اکسیجن اندازه بيخي کمیږي او کاربن ډای اکسايډ زياتيږي، چې د مغزو فعالیت بندوي او انسان مري.))
دا څووم ځل دی چې د ژمي په سړه هوا کې پکتیا کې د ګازي بخارۍ له امله خلک مري.
تېر کال دا مهال د احمدابا ولسوالۍ اړوند په مچلغو سیمه کې يوه ښځه او سړی د ګازي بخارۍ له امله د واده په لومړۍ شپه مړه شوي وو.
Visits: 6
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن