مفتي عزیز الرحمن له خپل شاګرد سره پر جنسي اړیکو اعتراف وکړ

<p style="text-align: justify;">کابل (پژواک، ۳۱ غبرګولی ۱۴۰۰) د پاکستان د لاهور ښار د یوې دیني مدرسې مشر مفتي عزیز الرحمن پولیسو ته منلې ده چې له خپل شاګرد سره یې جنسي اړیکې درلودې.</p>

<p style="text-align: justify;">نوموړی وروسته له هغه د پولیسو له خوا ونیول شو چې له خپل یوه شاګرد سره یې د جنسی اړیکو ویډیوپه ټولنیزو شبکو کې خپره شوه.</p>

<p style="text-align: justify;">د پاکستان جیو تلوېزیون د غبرګولي په ۳۱مه، خبر ورکړی چې مفتي عزیز الرحمن د پلټنو پر مهال منلې ده، چې جنسي اړیکې یې درلودې او د ده شاګرد قاري صابر شاه په پټه د نوموړي ویډیو اخیستې ده.</p>

<p style="text-align: justify;">هغه زیاته کړې چې دغه شاګرد ته یې ګواښونه کول چې که ورسره جنسي اړیکې ونه ساتي، نو په ازموینو کې به یې ناکام کړي او د بریا په بدل کې یې ورسره جنسي اړیکې نیولې.</p>

<p style="text-align: justify;">مفتي عزیز الرحمن ویلي، چې قاري صابر شاه د ده د زامنو له خوا ګواښل شوی و چې ویډیو به نه خپروي، خو هغه ویډیو خپره کړه.</p>

<p style="text-align: justify;">د نوموړي په وینا، کله چې صابرشاه پولیسو ته شکایت وکړ، نو میانوالي ولسوالۍ ته ولاړ، خو هلته پولیسو ونیوه.</p>

<p style="text-align: justify;">هغه په خپلې یادې کړنې پښېماني څرګنده کړې او ویلي یې دي چې تېروتلی دی.</p>

<p style="text-align: justify;">خو مفتي عزیز الرحمن د یادې ویډیو تر خپرېدو وروسته په یوه بله ویډیو کې پر قران کریم لاس ایښی و او ادعا یې کړې وه چې د نشې په حالت کې چې پر ځان نه پوهېده د یوې دسیسې له مخې یې دغه ویډیو اخیستل شوې ده.</p>

<p style="text-align: justify;">د راپورونو له مخې، د قاري صابر شاه په نوم متضرر طالب پولیسو ته شکایت کړی او ادعا یې کړې وه چې دغه مفتي د هرې جمعې په ورځ ورسره جنسي اړیکې نیولې.</p>

<p style="text-align: justify;">خو د ده له سپیناوي وروسته په ټولنیزو شبکو کې د نوموړي نورې ویډیوګانې هم خپرې شوې چې په عادي حالت کې له یاد شاګرد سره غیر اخلاقي کارونه کوي.</p>

<p style="text-align: justify;">بلخوا په دیني چارو کې د پاکستان د لومړي وزیر سلاکار او د پاکستان د علماوو بورډ مشر مولانا طاهر اشرفي ویلي چې د دغې پېښې په اړه پلټنې پیل شوې دي.</p>

<p style="text-align: justify;">هغه زیاته کړې وه چې دا یو شخصي عمل دی او له ادارو سره دې نه تړل کېږي.</p>

<p style="text-align: justify;">مفتي اشرفي ویلی و، له پلټنو وروسته که چېرې جرم ثابت شي، نو مجرم به سرچپه ځوړند کړای شي.</p>

<p style="text-align: justify;">د یادونې ده، چې مفتي عزیزالرحمن په لاهور ښار کې د مولانا فضل الرحمن په مشرۍ د مذهبي ګوند جمعیت علمای اسلام مرستیال او په همدغه ښار کې د پاکستان د دیني مدرسو د ادارې (وفاق المدارس) مسوول هم دی.</p>

<p style="text-align: justify;">خو له یادې پېښې وروسته هغه د وفاق المدارس له مسوولیت او د دارالعلوم له مشرۍ لرې کړای شوی دی.</p>