کابل(پژواک، ۳ تله ۱۴۰۰): د افغانستان له ۱۹ کلونو څخه کم عمره لوبډلې بنګله دېش لوبډلې ته په څلور ورځنۍ لوبه کې د څلورو وېکټو په توپير سره ماتې ورکړه.
دغو لوبډلو له دې مخکې پنځه د يو ورځنيو لوبو سيريز ترسره کړ چې د بنګله دېش لوبډلې دغه سيريز ۳/۲ وګاټه، خو په يواځنۍ څلور ورځنۍ سيالۍ کې بيا افغانستان بنګله دېش ته په څلورو وېکټو ماتې ورکړه.
په څلور ورځنۍ سيالۍ کې د بنګله دېش د ۱۹ کلنو لوبډلې لومړی توپ وهنه وکړه چې د ټولو لوبغاړو په سوځېدو سره يې ۱۶۲ منډې جوړې کړې.
په ورته مهال د بنګله دېش لوبډلې په ځواب کې افغان لوبډلې د ټولو لوبغاړو په سوځېدو ۲۸۱ منډې جوړې کړې.
په دويم پړاو کې بنګله دېش ۲۲۸ منډې جوړې کړې او افغان لوبډلې ته يې د ۱۱۰ منډو هدف وټاکه.
افغان لوبډلې یاد هدف د درې وېکټو په توپير بشپړ کړ او بريا يې ترلاسه کړه.
د افغان لوبډلې له لوري بلال سعيدي په لومړۍ پړاو کې سليزه ووهله او ۱۱۴ منډې يې جوړې کړې او دويم پړاو کې يې نيمه سليزه ووهله.
دغه راز بلال سميع او اظهار الحق په دغې سيالۍ کې ۸-۸ وېکټې واخيستې.
عصمت خاورين
ایډيټ: جاوېد همیم کاکړ
بشارت
Visits: 40
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن