خوست ښار (پژواک د مرغومي لومړۍ نېټه ۱۴۰۰): په خوست کې د ۲۴ ميليونه افغانيو په لګښت د حلقوي سړک د جوړېدو چارې پيل شوې.
دغه سړک چې د خوست ښار د څلورمې ناحيې اړوند د خبريال سړک څخه نیولی تر شيخ زايد پوهنتون پورې غځېدلی، نږدې دوه کيلومتره اوږدوالی لري.
د مسوولینو په وینا، د دغه سړک ترڅنګ د ۳۲۶ مترو په اوږدوالي لښتي هم شامل دي چې په اساسي ډول جوړیږي.
د خوست والي مولوي محمد نبي عمري د دغه سړک د کار د پيل پرمهال پژواک خبري اژانس ته وويل چې د دغې رغنيزې پروژې ټولې چارې به په ښه کيفيت ترسره کېږي.
د ده په وينا، په دې برخه کې ورته ناغېړي د منلو وړ نه ده او د ښاروالۍ له مسوولينو غوښتنه کوي چې په خپل وخت سره د سړک له چارو نظارت او څارنه وکړي.
دی زياته کړه: ((د افغانستان حکومت ژمن دی چې د اسلام، هېواد او ولس ته وړ عامه خدمات وړاندې کړي. ولایتي اداره د فساد په وړاندې جدي ده او په کې ښکېلو کسانو ته به د اسلام او قوانینو په چوکاټ کې سزا ورکول کېږي.))
ورته مهال د خوست ښاروال قاري بسم الله بلال بيا د یادې پروژې په پیلېدو خوښي وښوده، زیاته يې کړه، چې په منظمه توګه به ترې څارنه کوي.
ښاروال په نوي کال کې د ورته نورو رغنیزو پروژو د پیل ډاډ هم ورکړ چې په خبره يې زیاتره هغه به يې د ښاروالۍ له انکشافي بوديجې څخه رغول کېږي.
هغه وايي: ((د خوست ښاروالۍ مسوولین ولسونو ته د ښه خدماتو وړاندې کولو ژمنتیا لري. راتلونکي ۱۴۰۱ مالي کال لپاره خوست ښاروالۍ ګڼ شمېر پروژې پلان کړي، چې په تطبیق سره به یې خوست ښار ښکلا او پراختیا پيدا کړي.))
د نوموړي په وينا، د ياد سړک چارې به په راتلونکو درېيو مياشتو کې بشپړې شي.
Visits: 577
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن