ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

ads
تېره اوونۍ په افغانستان کې ۳۸ کسانو ته مرګ ژوبله اوښتې

تېره اوونۍ په افغانستان کې ۳۸ کسانو ته مرګ ژوبله اوښتې

author avatar
15 Jan 2022 - 17:07
تېره اوونۍ په افغانستان کې ۳۸ کسانو ته مرګ ژوبله اوښتې
author avatar
15 Jan 2022 - 17:07

کابل (پژواک، ۲۵ مرغومی ۱۴۰۰): تېره اوونۍ، ملګرو ملتونو او چین په داسې حال کې له افغانانو سره پر بشري مرستو د ټینګار ترڅنګ، له کنګله د افغانستان د پانګې د ایستلو غوښتنه وکړه چې افغانان له سختو اقتصادي ستونزو سره مخ دي.

  • ملګرو ملتونو له افغانانو سره د بشري مرستو لپاره د پنځه میلیارد ډالرو غوښتنه وکړه.
  • امریکا له افغانستان سره د ۳۰۸ ميليونه ډالرو بشري مرستې اعلان وکړ.
  • د افغانستان حکومت د ملګرو ملتونو د عمومي سرمنشي د یادې غوښتنې هرکلی وکړ.
  • د افغانستان حکومت: د دوحې تړون پلي کول د افغانستان او امریکا تر منځ ستونزې هوارولی شي.
  • د مولوي امیرخان متقي په مشرۍ پلاوي ایران کې له اسماعیل خان او احمدمسعود سره وکتل.
  • د افغانستان لپاره د امریکا ځانګړي استازي له حامد کرزي او عبدالله سره ټیلېفوني خبرې وکړې.
  • یو شمېر کابل مېشتې ښځې: کار او زده کړې غواړو.
  • تېره اوونۍ په افغانستان کې ۳۸ تنو ته مرګ ژوبله اوښتې ده.

مرګ ژوبله:

تېره اوونۍ په کابل، هرات، فاریاب، لغمان او ننګرهار ولایتونو کې په بېلابېلو پېښو کې ۲۲ تنه وژل شوي او ۱۶ نور ټپيان شوي دي.

د راپورونو پر بنسټ، ناپېژاندو وسله والو په هرات ښار کې يو صراف وژلی او د لغمان په قرغيو ولسوالۍ کې یې د يوې کورنۍ پنځه غړي وژلي او يو بل يې ټپي کړی دی.

دغه راز، د ننګرهار په لعلپورې ولسوالۍ کې د ګاز ډبې او ناچاودو توکو په چاودنو کې د ښوونځي نهه زده کوونکي او دوه ښځې وژل شوي، څلور ماشومان او يوه مېرمن ټپي شوې ده.

د راپورونو له مخې، په کابل ښار کې يوه کورنۍ وايي چې د دې ښار د دیارلسمې ناحیې اړوند سیمې د تلاشۍ په یوه چک پاینټ کې یې پر موټر ډزې شوې او یوه پېغله لور یې په کې وژل شوې ده.

دغه راز د راپورونو له مخې، د فارياب په بلچراغ ولسوالۍ کې د امنیتي ځواکونو د دوو سرګروپانو تر منځ نښته کې دوه تنه وژل شوي او درې نور ټپیان دي.

د راپورونو پر بنسټ، تېره اوونۍ د فارياب په مرکز ميمنې ښار کې د امنيتي ځواکونو د تصادفې ډزو له امله يو تن وژل شوی او یو بل ټپي دی. دغه راز، تېره اوونۍ په دغه ښار کې د یو لاریون پر مهال ډزو کې یو تن وژل شوی او څلور ټپیان دي.

د راپورونو له مخې، وړمه اوونۍ يوازې په کابل ښار کې دوه چاودنې شوې وې چې له امله يې دوه ملکي وګړي سرسري ټپيان شوي وو. دا په تېرو کلونو کې د مرګ ژوبلې تر ټولو ټیټه اوونیزه کچه ده.

 له افغانانو سره پر مرستو ټینګار

تېره اوونۍ ملګرو ملتونو او مرستندویه ادارو په افغانستان کې د بشري مرستو لپاره د پنځه میلیارد ډالرو مرستې غوښتنه وکړه، د امریکا متحده ایالتونو په ۲۰۲۲ کال کې له افغانستان سره د ۳۰۸ ميليونه ډالرو بشري مرستې اعلان وکړ، د خوړو نړیوال پروګرام له نړیوالو وغوښتل چې افغانستان ته د پیسو لېږد جاري وساتي، څو په روان ۲۰۲۲ زېږديز کال کې له اړمنو افغانانو سره مرستې وکړي او ايران چمتوالی وښود چې له افغانستان سره د هند بشري مرستې د دغه هېواد له لارې افغانستان ته ولېږدول شي.

هند شاوخوا څلور میاشتې مخکې له افغانستان سره د ۵۰زره ټنه غنمو او درملو مرسته اعلان کړه او پاکستان هم وویل،  هند کولی شي دغه توکي د پاکستان له لارې د افغانستان په موټرو کې ولېږدوي؛ خو تر اوسه دا کار نه دی شوی.

دا په داسې حال کې ده چې د امریکا متحده ایالتونو، وروسته له هغه چې د افغانستان پخوانی حکومت د تېرې زمري میاشتې په وروستیو کې ړنګ شو او ځای یې اوسني سرپرست حکومت ونیو، د افغانستان نږدې لس میلیارد ډالره پانګه کنګل کړه او پر افغانستان یو لړ نور بندیزونه هم ولګول شول. د دغو بندیزونو له امله افغانستان له سختو اقتصادي ستونزو سره مخ شوی دی.

«د افغانستان پانګه دې له کنګله وایستل شي»

د ملګرو ملتونو سرمنشي انتوني ګوتریش او چین تېره اوونۍ د امریکا له متحدو ایالتونو وغوښتل چې د افغانستان شتمني دې له کنګله وباسي. چین دا هم وویل، امریکا دې پر افغانستان یو اړخیز لګول شوي بندیزونه لرې کړي.

خلک، د ملګرو ملتونو سرمنشي او چین: امریکا دې د افغانستان شتمني له کنګله وباسي.

تېره اوونۍ کابل کې سلګونو کسانو هم د افغانستان د کنګل شوو پيسو د ازادېدو او د اوسني حکومت د په رسمت پېژندلو غوښتنه وکړه.

افغان چارواکي وایي، له امریکا سره د هغوی د دوحې تړون پلي کول د افغانستان او امریکا تر منځ ستونزې هوارولی شي او د افغان حکومت بهرنۍ پالیسي مثبته، بې طرفه، متوازنه او اقتصاد محوره ده.

بهرني سفرونه

تېره اوونۍ د افغانستان د بهرنیو چارو وزارت د سرپرست مولوي امیرخان متقي په مشرۍ پلاوي ایران او بیا ترکمنستان ته سفر وکړ.

د افغانستان د بهرنیو چارو وزارت ویلي و چې مولوي امیرخان متقي او ورسره پلاوی به د ترکمنستان له چارواکو سره د دوه اړخیزه سوداګرۍ، انرژۍ، نفتي توکو، ريل پټلۍ، له ترکمنستان څخه د افغانستان له لارې پاکستان او هند ته د ګاز نللیکې غځولو (ټاپي) او تحصلي بورسونه په تړاو خبرې وکړي.

دغه راز د افغانستان حکومت وايي ایران ته تللي پلاوي له ایراني چارواکو او دغه راز د هرات له پخواني والي او د جمعیت اسلامي ګوند مخکښ غړي محمد اسماعیل خان او د یاد ګوند له یوه بل مهم تن احمد مسعود سره کتلي او ډاډ یې ورکړی چې کولای شي له کومې اندېښنې پرته هېواد ته راستانه شي.

محمد اسماعیل خان د تېرې زمري میاشتې په وروستیو کې هرات کې طالبانو ونیو، خو د اعلان شوې عفوې له مخې یې خوشی کړ. هغه له خوشي کېدو وروسته ایران ته ولاړ. احمد مسعود هم په پنجشېر کې د طالبانو پر ضد جبهه پرانیسته، خو وروسته له هغه چې پنجشېر د اوسني حکومت امنیتي ځواکونو ونیو، مسعود له هېواده ووت.

د راپورونو له مخې، د یادې جبهې یو تن – چې نه غواړي نوم یې څرګند شي-  رسنیو ته ویلي چې اسماعیل خان او مسعود یاد پلاوي ته د انتقالي حکومت طرحه وړاندیز کړه، خو پلاوي هغوی ته افغانستان ته د راستنېدو وړاندیز وکړ او په دې ترتیب دغه خبرې بې پایلې پاتې شوې.

له کرزي او عبدالله سره د توماس ویسټ خبرې

پخواني ولسمشر حامدکرزي د افغانستان لپاره د امریکا له ځانګړي استازي سره د افغانستان له خلکو سره د بشر دوستانه مرستو د تسهیل، له ښوونکو، استادانو او روغتیایي کارکوونکو سره د مرستې او په افغانستان کې د زده کړو په ځانګړې توګه د نجونو لپاره د زده کړو د زمینې برابرولو په اړه ټیلېفوني خبرې کړې دي.

په ورته مهال، د پخواني حکومت د پخلاينې شورا مشر ډاکتر عبدلله عبدالله د افغانستان لپاره د امریکا له ځانګړي استازي توماس وسټ سره د اوسني بشري بحران، د خلکو ستونزو ته د رسېدنې په موخه د نویو طرحو او عملي لارو چارو، د زده کړو او روغتیایي موضوعاتو په اړه خبرې کړې دي.

د ښځو حقونو ته دې درناوی وشي

د راپورونو له مخې، تېره اوونۍ ځینو ښځو د شپې له خوا کابل ښار کې پر دیوالونو لیکلي وو:« زه ښځه يم، کار او زده کړې زموږ حق دی، ډوډۍ، کار، خپلواکي.»

دا په داسې حال کې ده چې د افغانستان حکومت ویلي چې د ښځو شرعي حقونو؛ لکه زده کړې، کار، ملکیت او … ته ژمن دی او ژر به د نجونو ښوونځي او پوهنتونونه هم پرانیزي.

Hits: 108

ورته موضوع

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.