<p style="text-align: justify;">ګردېز (پژواک، ۱۱ غبرګولی ۱۴۰۱): د پکتيا ولایت د مرکز او ولسواليو له روغتيايي مرکزونو سره د ٣١ موټرسايکلونو او يوه امبولانس مرسته وشوه.</p>
<p style="text-align: justify;">د ترانسپورټي وسايطو دغه مرسته د (AADA) ادارې له خوا شوې او هغه روغتيايي کارکوونکي به ترې ګټه اخلي چې ګرځنده روغتيايي خدمات وړاندې کوي.</p>
<p style="text-align: justify;">د پکتیا مرستیال والي شيخ عزیزالرحمن منصور وويل: «دغه ترانسپورټي وسايل به د خدماتو وړاندې کولو برخه کې روغتيايي کارکوونکو ته اسانتیا رامنځته کړي او موږ له يادې او نورو ادارو هيله کوو چې د روغتيا په برخه کې خپل خدمات زيات کړي.))</p>
<p style="text-align: justify;">نوموړي وويل، د دغه ولايت ډېرې سیمې غرونه لري؛ نو روغتیايي کارکوونکو ته د خدماتو وړاندې کولو کې وسایطو ته اړتیا ډېره وه.</p>
<p style="text-align: justify;">منصور وويل، په دې وروستيو کې ځینو مرستندویه ادارو د پکتيا له روغتيايي سکټور سره په بېلابېلو برخو کې مرستې کړې دي خو زیاتوي چې دا مرستې دې نورې هم وغځېږي.</p>
<p style="text-align: justify;">د پکتيا د عامې روغتيا ریيس صدرالدين عزام پژواک ته وويل: «کوم ترانسپورټي وسايل چې نن ورځ موږ ته راکړل شول، د دغه رياست لپاره ډېر اړين وو او له دې سره به زموږ په خدماتي چارو کې ښه والی او چټکوالی راشي.))</p>
<p style="text-align: justify;">نوموړي وويل چې پخوا به د ګرځنده روغتيايي پرګرامونو لپاره شخصي موټر کرایه کېدل خو اوس د دې وسايلو په ترلاسه کولو سره به لګښت هم کم شي او په کار کې به چټکتیا هم راشي.</p>
<p style="text-align: justify;">عزام وويل چې له دغو وسایطو به واکسيناتوران او هغه ګرځنډه ټيمونه ګټه اخلي چې په لرو پرتو سيمو کې روغتيايي خدمات وړاندې کوي.</p>
<p style="text-align: justify;">د يادونې ده، دا مهال په پکتيا کې شاوخوا پنځوس لوی او واړه روغتيايي مرکزونه موجود دي چې ځيني يې لا هم د درملو، طبي او نورو وسايلو له اړخه مجهز نه دي او مرستې ته اړتيا لري.</p>
