پل علم (پژواک، ۲۷ چنګاښ ۱۴۰۱): د ملګرو ملتونو له ماشومانو د ملاتړ صندوق/UNICEF له خوا د لوګر په مرکز پلعلم کې د نایب امینالله خان لوګري په ۳۰۰ بستریز روغتون کې د کرونا ناروغانو د درملنې ځانګړی مرکز پرانیستل شو.
د لوګر د عامې روغتیا ریاست د ساري ناروغیو مسوول سید جعفر سادات پژواک خبري اژانس ته وویل، د کرونا ناروغانو د درملنې دغه مرکز ۶ بسترونه لري چې په ټولو طبي وسایلو سنبال دی او ۲۴ ساعته خدمات به وړاندې کوي.
هغه زیاته کړه، په دې ورستیو کې په یاد ولایت کې پر کرونا ناروغۍ د اخته کسانو شمېر ډېر شوی او په تېرو شپږو میاشتو کې له شاوخوا ۳۵۰۰ مشکوکو ناروغانو څخه یې ۶۷۵ کسانو د معایناتو پایلې مثبتې راغلې دي.
دی زیاتوي: «په لوګر کې د کرونا ناروغانو د مثبتو پېښو له زیاتېدو وروسته د یونسیف له خوا په مرکز پل علم کې د کرونا ناروغانو د درملنې لپاره ځانګړی مرکز پرانیستل شو، دغه روغتیايي مرکز ۶ بستره او ۲۲ روغتیايي کارکوونکي لري او ۲۴ ساعته به ناروغانو ته خدمات وړاندې کوي.»
د لوګر مرستیال والي مولوي انعامالله صلاحالدین د دغه روغتیايي مرکز د پرانیستې په غونډه کې وویل، د کرونا ډېرو مثبتو پېښو ته په کتو اړتیا وه چې داسې یو روغتیايي مرکز پرانیستل شي.
هغه د لوګر له عامې روغتیا ریاست څخه وغوښتل چې له یاد روغتیايي مرکز څخه وخت پر وخت لیدنه وکړي او د ناروغانو اړتیاوې په خپل وخت پوره کړي.
خلک هم د یونیسف له خوا په دغه ولایت کې د کرونا ناروغانو د درملنې د ځانګړي مرکز جوړول مثبت ګام بولي.
د مرکز پلعلم یوه اوسېدونکي عبدالروف پژواک خبري اژانس ته وویل، نور به اړ نه وي چې د کرونا ناروغۍ د معایناتو او درملنې لپاره پلازمینې کابل او یا هم نورو ګاونډیو ولایتونو ته لاړ شي.
خو هغه په دې برخه کې د لا ډېرو اسانتیاوو برابرولو او د مسلکي کسانو د ګومارلو غوښتنه وکړه.
د یادونې ده چې تېر کال هم د افغانستان د عامې روغتیا وزارت له خوا د نایب امینالله خان په ۳۰۰ بستریز روغتون کې د کرونا ناروغانو د درملنې لپاره ۵۰ بستریز مرکز پرانیستل شوی و چې له درېیو میاشتو فعالیت وروسته د اقتصادي ستونزو له امله بېرته وتړل شو.
Visits: 52
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن