اټلانټا (پژواک، ۱۵ وږی ۱۴۰۱): د شل اووریز کرکټ اسیا جام سیالیو دویم پړاو یوه لوبه کې سریلانکا هم هند ته ماتې ورکړه.
دا سیالۍ چې په متحده عربي اماراتو کې روانې دي، د دویم پړاو د دې مهمې لوبې پچه سریلانکا وګټله او لومړی یې د توپاچونې پرېکړه وکړه.
د هندوستان لوبډلې په ټاکل شوو ۲۰ اورونو کې د شپږو لوبغاړو په سوځېدو ۱۷۳ منډې جوړې کړې او سریلانکا ته یې د ۱۷۴ منډو هدف ورکړ.
د هند له لوري روهیت شرما ۷۲ او یادف ۳۴ منډې جوړې کړې او د سریلانکا له لوري مدوشانکا ۳، کلورتني او شناکا دوه دوه لوبغاړي وسوځول.
د سریلانکا لوبډلې یاد هدف له یوې په زړهپورې سیالۍ وروسته د شلم اوور په پنځم توپ د څلورو لوبغاړو په سوځېدو ترلاسه کړ او لوبه یې وګټله. د دوی له لوري مینډس ۵۷ او نسانکا ۵۲ منډې جوړې کړې.
د سریلانکا شناکا د لوبې غوره لوبغاړی اعلان شو.
له دې مخکې د دویم پړاو سیالیو په لړ کې پاکستان هند ته ماتې ورکړې وه.
Visits: 30
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن