<p style="text-align: justify;">مزارشریف (پژواک، ۲۵ وږی ۱۴۰۱): د بلخ د مرکز مزارشریف یو شمېر درمل پلورنکي وایي، د درملو پر وارداتو د حکومتي محدويتونو او نامناسب بانکي سيسټم له امله د درملو بيې لوړې شوې دي.</p>
<p style="text-align: justify;">دوی وايي، د درملو د وارداتو لپاره جوړه شوې کړنلاره څو لسيزې پخوانۍ ده چې له امله يې دوی د سرطاني، زړه، شکرې، کرونا او يو شمېر نورو ناروغيو درمل نه شي واردولی.</p>
<p style="text-align: justify;">د درمل پلورونکو په خبره، په هېواد کې د بانکي سيسټم خرابوالی هم د دې سبب شوی چې دوی د بانک له لارې د درملو توليدوونکو شرکتونو ته پيسې نه شي حواله کولای او د صرافيو له لارې د پيسو حواله کېدو لګښت زيات وي چې ورسره د درملو بيې لوړېږي.</p>
<p style="text-align: justify;">بلخ کې د درملو يوه عمده پلورونکي سيد اکرام سادات پژواک ته وويل، دا مهال په بلخ کې درمل پلورونکي د سرطاني، زړه، شکرې او نورو ناروغیو درملو له کمښت سره مخ دي.</p>
<p style="text-align: justify;">دی وايي: «زموږ له عمده ستونزو د حکومت له لوري ترکیبي درملو ته د پرفورم نه ورکول دي او سلګونه د درملو ډک کانټینر مو په ګمرکونو کې ایسار دي، اوس هم د امانالله خان د واکمنۍ د وخت پرفورم عملي کېږي.»</p>
<p style="text-align: justify;">سادات د درملو بیې لوړوالي بل لامل د بانکي سیسټم نشتوالی بولي او زياتوي چې پخوا به له افغانستانه بهرنیو هېوادونو ته پیسې د بانک له لارې په اسانه لېږل کېدې خو اوس پر ۱۰۰زره ډالرو ۲۰۰۰ ډالر لګښت راځي.</p>
<p style="text-align: justify;">په بلخ کې د اریا درملو مارکېټ يوه درمل پلورونکی نوید صفري هم په بانکي سیسټم کې د ستونزو شتون د درملو بیې لوړېدو لامل بولي.</p>
<p style="text-align: justify;">هغه وایي: «د سم بانکي سیسټم نشتون د دې لامل شوی چې د درملو بیه لوړه شي، پخوا په مستقیمه توګه بهرنیو هېوادنو ته پیسې ټي ټي کېدې خو اوس له نورو لارو لېږل کېږي چې کمیشن یې څو برابره زیات راځي.»</p>
<p style="text-align: justify;">بلخوا په شمال کې د درملیزو خدمتونو ټولنې مشر انجینر محمدشعیب ساپی د جمهوریت له سقوط وروسته په بانکي سیسټم کې بدلون او د افغانیو پر وړاندې د ډالر لوړېدل د دې ستونزې لامل بولي.</p>
<p style="text-align: justify;">هغه همدا راز وایي، د حکومت پرفورم (د درملو د وارداتو طرزالعمل) کې د کابو ۶۰ کاله وړاندې مجوز لېست چې ۱۷۰۰ قلمه درمل په کې شامل دي، عملي کېږي خو اوس د افغانستان د اړتیا وړ درمل ۱۷۰۰۰ قلم درملو ته رسېږي.</p>
<p style="text-align: justify;">دغه راز د مزارشريف اوسېدونکي صميم ناصري پژواک ته وويل چې په دې وروستيو کې په دغه ولايت کې د درملو بيې لوړې شوې دي.</p>
<p style="text-align: justify;">هغه وايي: «پخوا به مو يو پاکټ پراسټامول په لس افغانۍ اخيستل خو اوس يې په ډېرو کمو ځايونو کې په لس افغانۍ ورکوي، يو بوتل د ټوخي شربت نوکف به مو په پنځوس افغانۍ اخيستل خو اوس ٧٠ ته لوړ شوى، همداسې نور شيان هم حساب کړه.»</p>
<p style="text-align: justify;">د اړوندې موضوع په اړه د بلخ د عامې روغتیا ریاست د قوانینو او بررسۍ مسوول ډاکټر جاوېد سراجي بیا پژواک ته وويل چې د حکومت له لوري پر درملو لګېدلي محدودیتونه په بازار کې د بې کیفیته درملو د شتون له امله رامنځته شوي.</p>
<p style="text-align: justify;">هغه زیاتوي، دغې ادارې دا مهال کابو شل ټنه بې کیفیته درمل له بازاره ټول کړي او هم د احتکار کوونکو پر وړاندې یې د پنځوس برابره جریمې نوی قانون تصویب کړی چې چا ته اجازه نه ورکوي درمل له ورکړل شوې نرخنامې څخه لوړ وپلوري.</p>
<p style="text-align: justify;">د يادونې ده، د افغانستان په بازارونو کې دا مهال تر ډېره پاکستاني، هندي، ترکي، چينايي، عربي او د ځينو نورو هېوادونو درمل پلورل کېږي.</p>
