منځپانګې ته تلل
چهارشنبه ۱۸ نومبر ۲۰۲۶ · کابل ۷:۱۱ غ.و
۹°صاف · ↑۱۴° ↓۱°د هوا کیفیت: منځنی

د چین سفیر: د افغانستان د سرپرست حکومت ملاتړ کوو

· ۲ دقیقې لوستل · ۲۲۷ کتنې · تازه شوی
دیدار امیر خان مقتی سرپرست وزارت خارجه با وانک یو سفیر چین در کابل
دیدار امیر خان مقتی سرپرست وزارت خارجه با وانک یو سفیر چین در کابل

کابل (پژواک، ۲۶ لړم ۱۴۰۱): په کابل کې د چین سفیر وایي، د افغانستان نوي سرپرست حکومت ملاتړ ته دوام ورکوي او د دواړو هېوادونو اړیکو ته د اهمیت په سترګه ګوري.

د افغانستان د بهرنیو چارو وزارت مرستیال ویاند حافظ ضیا احمد په خپله ټویټرپاڼه کې لیکلي، دا څرګندونې په کابل د چین سفیر وانګ یو، د بهرنیو چارو وزارت له سرپرست مولوي امیر خان متقي سره په لیدنه کې کړې دي.

نوموړی وایي: «په کابل کې د چین سفیر وانګ یو نن د بهرنیو چارو له وزیر مولوي امیر خان متقي سره ولیدل او پر یو شمېر مهمو موضوعاتو یې خبرې وکړې، وانګ یو د خبرو په پیل کې وویل چې هېواد یې د نوي سرپرست حکومت ملاتړ ته دوام ورکوي او د دواړو هېوادونو اړیکو ته د اهمیت په نظر ګوري.»

سرچینې زیاته کړې، د چین سفیر د ژمي په را رسېدو د خپل هېواد له خوا د ژمنیو مرستو یادونه وکړه چې له اړوندو ادارو سره په همغږۍ به د یوه میکانیزم پر اساس پر اړو افغانانو ووېشل شي.

د ده په خبره، د بهرنیو چارو وزارت سرپرست هیله څرګنده کړه چې د دواړو هېوادونو اړیکې نورې هم پیاوړې شي.

د سرچینې په حواله، متقي له چین څخه مننه وکړه چې د افغانانو د لاسنیوي په موخه یې د نیمه پاتې او نوو پروژو پیلولو ته چمتووالی ښودلی دی.

هغه دغه‌راز د چین وروستی اقدام وستایه چې د ۹۸ سلنه افغاني محصولاتو له لړه یې د مالیې وړ توکو تعرفې صفر ته ټیتې کړې دي.