مزارشریف (پژواک، ۵ کب ۱۴۰۱): د بلخ ولایت د امر بالمعروف او نهی عنالمنکر ریاست له خپلو محتسبینو غوښتي چې راتلونکې اونۍ د بېحجابۍ د مخنیوي لپاره درې ورځې د ښار په بېلابېلو سیمو کې وګرځي او همداراز د بېلماځو کسانو لست دې دغې ته وسپاري.
یاد ریاست د یوې اعلامیې په خپرولو سره ویلي، د بلخ د امر بالمعروف او نهی عنالمنکر ریاست پرون په یوه ناسته کې –چې د دغه ولایت د امر بالمعروف رییس مولوي سردارمحمد حیدري او محتسبینو ګډون درلود- د ځینو موضوعاتو په اړه بحث وکړ او په تړاو یې پرېکړې وشوې.
سرچینې لیکلي، په دغه ناسته کې پرېکړه وشوه چې راتلونکې اونۍ د هرې حوزې محتسب به د بېلماځو کسانو لست د حوزې امر ته سپاري.
په اعلامیه کې راغلي: «د بېحجابۍ د مخنیوي لپاره به راتلونکې اونۍ په ټول ښار کې د درې ورځو لپاره عمومي ګرځېدنه ترسره شي.»
دغهراز پرېکړه شوې چې د شنبې په ورځ به د ودونو هوټلونو له مدیرانو سره د موسیقۍ مخنیوي او ځینو نورو مسایلو په اړه ناسته ترسره شي.
د اعلامیې پر اساس، په یاده ناسته کې ویل شوي چې هر محتسب د دې ترڅنګ چې تواضع او عاجزي پر ځان لازمي کوي، د مسوولیت احساس دې ولري او له بعیت سره به خیانت نه کوي.
Visits: 117
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن