فراه (پژواک، ۱۳ غويی ۱۴۰۲): د فراه ولایت یو شمېر اوسېدونکي وايي، کله چې د ۵۰ کیلوګرامه اوړو بیه ۲۵۰۰ افغانۍ وه نو په نانواييګانو یوه ډوډۍ په ۲۰ افغانۍ پلورل کېده، خو اوس چې د اوړو بیه ۱۶۰۰ افغانیو ته ټیټه شوې نو د ډوډۍ په بیه کې بدلون نه دی راغلی.
دغه کسان له ښاروالۍ غواړي چې په بازار کې دې د وچې ډوډۍ وزن او بیه کنټرول کړي او چاته د سرغړونې اجازه ور نهکړي.
بلخوا، نانوایان او ښاروالي وايي چې د اوړو بیې په لوېدو سره د ډوډۍ وزن ډېر شوی دی.
د فراه مرکز د لومړۍ ناحیې اوسېدونکی جاوېد مظلومیار وايي، څو میاشتې مخکې د ۵۰ کیلوګرامه اوړو بیه ۲۵۰۰ افغانیو ته لوړه شوه او هغه وخت په نانواييګانو کې د یوې ډوډۍ بیه ۲۰ افغانۍ وه، خو په وینا يې چې اوس همدغه اندازه اوړه په ۱۶۰۰ افغانۍ پلورل کېږي خو د ډوډۍ په بیه کې بدلون نه دی راغلی.
هغه زیاته کړه، ښاروالي دې د ډوډۍ وزن او بیه کنټرول کړي.
د فراه ښار د چهارباغ کلي اوسېدونکي محمدحسن هم وویل: «اوړه او غنم ارزانه شوی دي، خو ډوډۍ لاهم قیمته ده او باید د وچې ډوډۍ بیه هم را کمه شي.»
بلخوا بیا د یاد ولایت نانوایان او ښاروالي وايي، نرخونه هره میاشت ټاکل کېږي او هېڅوک سرغړونه نه شي کولای.
د فضلاحمد په نوم یو کس چې په فراه ښار کې نانوايي لري، وايي: «موږ ته هره میاشت د ښاروالۍ ریاست له لوري نرخنامه راکول کېږي، هغه مهال چې اوړه ګران و، د یوې ډوډۍ وزن ۳۵۰ ګرامه و، خو اوس ۴۰۰ ګرامه دي.»
د احسامالدین په نوم یو بل نانوايي هم وايي چې د اوړو د بیو په لوېدو سره د ډوډۍ وزن ډېر شوی دی.
هغه زیاته کړه، نرخونه هره میاشت د ښاروالۍ له خوا ټاکل کېږي او څوک سرغړونه نشي کولای.
د فراه ښاروالي مني چې د اوړو او غنمو بيې د پخوا په پرتله ټيټې شوې او دوی هم نانواييګانو ته ویلي چې د ډوډۍ وزن زیات کړي.
د ښاروالۍ مطبوعاتي مسوول قاري عبدالعلي کامیاب پژواک خبري اژانس ته وویل: «موږ هره میاشت نرخونه کنټرولو، پخوا چې د اوړو بیه لوړه وه نو د هرې وچې ډوډۍ وزن ۳۳۰ ګرامه و، بیا د هرې میاشتې په تېرېدلو سره چې کله اوړه ارزانه شوي دي نو هممهاله ورسره د هرې ډوډۍ وزن له ۱۰ تر ۲۰ ګرامه زیات شوی دی.»
هغه زیاته کړه، د روانې میاشتې لپاره هم نرخونه ټاکل شوي او د هرې ډوډۍ وزن ۴۰۰ ګرامه ښودل شوی دی.
نوموړي وویل، د ښاروالۍ له نرخپاڼې څخه هیچاته د سرغړونې اجازه نه ورکوي.
Visits: 222
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن