کابل (پژواک، ۲۵ تله ۱۴۰۲): د صنعت او سوداګرۍ وزارت وایي چې د دغه وزارت سرپرست په یو رسمي سفر د «یو کمربند یوه لار» ناسته کې د ګډون په موخه چین ته ولاړ.
د صنعت او سوادګرۍ وزارت د یادو څرګندو ترڅنګ پر خپله اېکسپاڼه لیکلي چې هغه به د یادې غونډې په څنډه کې له چیني سوداګرو، پانګوالو، صنعتکارانو او په یاد هېواد کې له افغان سوادګرو سره هم وګوري.
د صنعت او سوداګرۍ وزارت ویاند اخندزاده عبدالسلام جواد تېره ورځ پژواک خبري اژانس ته ویلي وو چې دغه سفر د چین په بلنه ترسره کېږي.
هغه زیاته کړې وه چې افغانستان به د یو کمر بند یوه لار له پروګرام سره وصل شي او په دې غونډه کې یوه بله مهمه موضوع چې خبرې پرې کېږي، د واخان لار ده چې افغانستان غواړي له دې لارې له چین سره سوداګري وکړي.
د صنعت او سوادګرۍ وزارت معلوماتو له مخې، دا ناسته د روانې اونۍ د چهارشنبې او پنجشنبې په ورځو ترسره کېږي او ټاکل شوې په دې ناسته کې د روسیې ولسمشر ولادیمیرپوتین هم ګډون وکړي.
د یو کمربند یوه لار طرحه د چین هېواد ده چې یوه لسیزه مخکې یې د ځمکې او اوبو له لارې له اسیا سره د افریقا او اروپا نښلولو لپاره جوړه کړه.
Views: 254
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن