<p style="text-align: justify;">مزارشریف (پژواک، ۱۳ وری ١۴٠۳): د بلخ ولایت چمتال ولسوالۍ د بېلابېلو سيمو يو شمېر اوسېدونکي د څښاک پاکو اوبو ته له نه لاسرسي شکايت لري او د دې ستونزې د حل غوښتنه کوي.</p>
<p style="text-align: justify;">په همدې حال کې د بلخ سیمهییز چارواکي هم دا ستونزه تاییدوي او پر هواري یې ټینګار کوي.</p>
<p style="text-align: justify;">د چمتال ولسوالۍ د پشمقلعه سيمې اوسېدونکي ګلمحمد پژواک ته وويل، د څښاک پاکو اوبو ته د نه لاسرسي له امله هره ورځ څو کيلومتره مزل کوي څو ورته لاسرسى پيدا کړي.</p>
<p style="text-align: justify;">هغه وويل: «زموږ ستونزې ډېرې دي؛ ماشومان مو له سینده اوبه راوړي، له درس او زدهکړو بېبرخې دي، له اسلامي امارته غواړو چې زموږ لپاره د اوبو څاهګانې او ذخیرې جوړې کړي، څو له دې ستونزو خلاص شو.»</p>
<p style="text-align: justify;">د چمتال ولسوالۍ بل اوسېدونکی سخيداد وايي، د دې ولسوالۍ پشمقلعه سیمه کې تر شپږ سوه پورې کورنۍ د څښاک پاکو اوبو ته لاسرسی نه لري.</p>
<p style="text-align: justify;">نوموړی دغه وضعیت د دوی لپاره ستونزمن ګڼي او له مسوولو بنسټونو د همکارۍ او مرستې غوښتنه کوي.</p>
<p style="text-align: justify;">دغه راز، د چمتال ولسوالۍ یوه قومي مشر محمدنذیر هم وویل چې یاده ولسوالۍ کې ډېری خلک پاکو اوبو ته لاسرسی نه لري او له ویالو او ډنډونو خپل د اړتیا اوبه پوره کوي.</p>
<p style="text-align: justify;">هغه زیاتوي چې دغه اوبه نه یوازې چې صحي نه دي بلکې د وچکالۍ او واورې ورښتونو پر مهال لاسرسی ورته تر دې هم ستونزمن وي.</p>
<p style="text-align: justify;">د چمتال ولسوالۍ يو شمېر نور اوسېدونکي بيا وايي، د څښاک پاکو اوبو ته لاسرسي برخه کې له پرلهپسې غوښتنو سره سره، تر اوسه په دې برخه کې کومه پاملرنه نه ده شوې.</p>
<p style="text-align: justify;">ورته مهال، د چمتال ولسوال نورالله همام هم د خلکو دغه ستونزه پر ځای بولي او پر حل کېدو یې ټینګار کوي.</p>
<p style="text-align: justify;">هغه زیاته کړه: «وروستیو کې چې یو شمېر نور کلي هم دې ولسوالۍ سره یوځای شوي، په ټوله کې په دغه ولسوالۍ کې ۹۰ کلي دي چې د پشمکلا، جرکلا، نوشار، امامصاحب او ډېر نور کلي د اوبو ستونزې لري.»</p>
<p style="text-align: justify;">د هغه د شمېرنې له مخې، څه باندې ۳۰ کلي په دغه ولسوالۍ کې پاکو اوبو ته لاسرسی نه لري.</p>
<p style="text-align: justify;">هغه وویل، تر خپلې وسې هلې ځلې کوي څو د یادو خلکو دغه ستونزه حل کړي.</p>
<p style="text-align: justify;">ولسوال په پلازمېنې کابل کې هم له حکومتي مسوولینو غوښتنه وکړه چې د یادې ستونزې په حل کې ورسره همکاري وکړي.</p>
<p style="text-align: justify;">د يادونې ده چې د چمتال ترڅنګ د بلخ په یو شمېر نورو ولسواليو کې هم خلک د څښاک پاکو اوبو ته لاسرسى نه لري.</p>
