<p style="text-align: justify;">کابل (پژواک، د غويي لومړۍ نېټه ۱۴۰۳): تېره اونۍ، کابل ته د بهرمېشتو افغانانو یو پلاوی راغی، بېلابېلو بنسټونو له پاکستانه د افغان کډوالو پر ایستلو اندېښنه وښوده، واشنګتڼ د ښځو حقونو ته پر درناوي ټینګار وکړ، ا.ا وویل، د ښځو حقونه تامین دي او ایراني چارواکو ټینګار وکړ چې په هېواد کې یې د ا.ا مخالفینو ته د سیاسي فعالیت اجازه نه ورکوي.</p>
<p style="text-align: justify;"><strong>د تېرې اونۍ مهم خبرونه:</strong></p>
<ul style="text-align: justify;">
<li>تېره اونۍ ۱۷۴۵ افغان کډوال په زور له پاکستانه راایستل شوي</li>
<li>بېلابېلو نړۍوالو بنسټونو له پاکستانه د افغان کډوالو پر ایستلو اندېښنه ښودلې ده</li>
<li>ا.ا: د افغان کډوالو د راستنېدو لپاره چمتووالی لرو</li>
<li>واشنګټن: ا.ا دې د ښځو حقونو ته درناوی وکړي</li>
<li>حنفي: چا ته اجازه نه ورکوو چې د ښځو حقونه تر پښو لاندې کړي</li>
<li>مرتضوي: ایران کې د ا.ا مخالفین د سیاسي فعالیتونو اجازه نه لري</li>
<li>کابل ته د بهرمېشتو افغانانو راغلی پلاوی: د خلکو غوښتنې د ا.ا تر چارواکو رسوو</li>
</ul>
<p style="text-align: justify;"><strong>مرګژوبله</strong></p>
<p style="text-align: justify;">تېره اونۍ په افغانستان کې په بېلابېلو پېښو کې پنځه کسان وژل شوي او پنځه نور ټپیان وو.</p>
<p style="text-align: justify;">د راپورونو له مخې، بدخشان کې لاسي بم چاودنې له امله يو ځوان خپل ژوند له لاسه ورکړی او یو سپینږیری ټپي شوی، کندهار کې هم د یوې زړې مرمۍ او یوې سرګلولې چاودنو له امله يو کس خپل ژوند له لاسه ورکړی او دوه نور ټپيان شوي دي.</p>
<p style="text-align: justify;">ځايي چارواکي وايي، سرپل کې د کورنۍ شخړې له امله يوه کس خپل باجه وژلی او دوه د ترور زامن يې ټپیان کړي او کاپيسا کې هم د کورني خصومت په پایله کې دوه ښځې په ډزو وژل شوې دي.</p>
<p style="text-align: center;"><img class="aligncenter wp-image-609076 size-full" src="https://pajhwok.com/wp-content/uploads/2024/04/P-1.jpg" alt="" width="621" height="550" /></p>
<p style="text-align: justify;">یادونه: د مرګژوبلې یادې شمېرې پژواک ته د رسېدلو راپورونو له مخې ښودل شوې، خو کېدای شي د ځینو پېښو په اړه یې راپورونه نه وي ترلاسه کړي او یا سرچینو د مرګژوبلې کره شمېرې نه وي ښودلې.</p>
<p style="text-align: justify;">د سرچينو د معلوماتو له مخې، وړمه اونۍ په افغانستان کې په بېلابېلو پېښو کې اووه کسان وژل شوي او دوه نور ټپیان وو.</p>
<p style="text-align: center;"><iframe src="https://docs.google.com/spreadsheets/d/e/2PACX-1vRtVTLhUj3h-Ripait-DEsb0NVlhS96Suv78TxWTWotsO5YFa3lGGAgVJL6SHtyEmaulwz-P2BG1A6M/pubchart?oid=2108273474&format=interactive" width="600" height="371" frameborder="0" scrolling="no" seamless=""></iframe></p>
<p style="text-align: justify;">دا په داسې حال کې ده چې په هېواد کې د وړم کال د زمري میاشتې له بدلون مخکې د جنایي پېښو ترڅنګ په جګړو کې هره اونۍ سلګونو ملکي وګړو او د ښکېلو غاړو کسانو ته مرګژوبله اوښته.</p>
<p style="text-align: justify;"><strong>له پاکستان د افغان کډوالو په زور ایستلو لړۍ دوام</strong></p>
<p style="text-align: justify;">د راپورونو له مخې، له پاکستانه د افغان کډوالو ایستلو دویمه لړۍ د تېرې وري میاشتې په ۲۶مه پیل شوې او کېدای شي په دې پړاو کې پاکستان شاوخوا ۸۰۰ زره افغان کډوال راوباسي.</p>
<p style="text-align: justify;">دا په داسې حال کې ده چې د افغانستان د کډوالو او راستنېدونکو چارو وزارت ويلي چې تېره اونۍ ۱۷۴۵ افغان کډوال په زور له پاکستان راایستل شوي دي.</p>
<p style="text-align: justify;">د افغان کډوالو راایستلو د دغه پړاو له پیل سره سم، تېره اونۍ، د بېپولې ډاکټرانو سازمان (اماېساېف) <a href="https://pajhwok.com/ps/2024/04/17/free-doctors-we-are-worried-about-the-afghans-who-are-being-deported-from-pakistan/">ويلي</a>، په جدي ډول د هغو افغانانو په اړه اندېښنه لري چې له پاکستانه افغانستان ته ایستل کېږي.</p>
<p style="text-align: justify;">سرچينې زياته کړې چې ډېری دغه افغانان له روغتیايي خدمتونو بېبرخې دي او له بېوزلۍ ځورېږي.</p>
<p style="text-align: justify;">دغه راز، د ماشومانو ژغورنې بنسټ هم اندېښنه ښودلې او <a href="https://tolonews.com/index.php/pa/afghanistan-188377">ویلي</a> يې دي چې له پاکستانه د راایستل شوو کورنیو ډېری ماشومان پوره خوړو، زدهکړو او سرپناه ته لاسرسی نه لري.</p>
<p style="text-align: justify;">ملګرو ملتونو بيا په یوه تازه راپور کې <a href="https://pajhwok.com/ps/2024/04/18/returning-refugees-to-afghanistan-united-nations-the-world-should-continue-to-help-this-country/">ویلي</a>، اړتیا ده چې افغانستان ته له ګاونډیو هېوادونو په ډېر شمېر د کډوالو ستنولو له امله له دغه هېواد سره دوامداره مرستې وشي.</p>
<p style="text-align: justify;">د افغانستتان د کډوالو وزارت ویاند مفتي عبدالمطلب حقاني رسنيو ته <a href="https://twitter.com/HurriyatPa/status/1780567433251574131">ویلي</a>: «وروستيو کې چې کوم ضرب الاجل اعلان شوی، د بعضو رسنیو له لارې نه، دغه ضرب الاجل رسمي نه دی؛ تر اوسه په پاکستان کې هم حالت عادي دی او کومې کورنۍ چې افغانستان ته راستنېږي هم د پخوا په څېر عادي حالت کې راستنېږي؛ په دې کې کوم زياتوالی نه دی راغلی.»</p>
<p style="text-align: justify;">هغه زياته کړې، اسلامي امارت له پاکستانه غوښتي چې افغانان باید د يو ګډ ميکانيزم او تفاهم له لارې راوایستل شي.</p>
<p style="text-align: justify;">د ده په وینا، اسلامي امارت، په ځانګړي ډول د کډوالو او راستنېدونکو چارو وزارت د افغان کډوالو د راستنېدو لپاره پوره چمتووالی لري.</p>
<p style="text-align: justify;">د راپورونو له مخې، د تېر میلادي کال له اکتوبر راوروسته له پاکستانه شاوخوا ۵۰۰ زره افغانان په زور راایستل شوي دي.</p>
<p style="text-align: justify;"><strong>د ښځو حقونه</strong></p>
<p style="text-align: justify;">تېره اونۍ، د امریکا بهرنیو چارو وزارت ویاند مرستیال ودانټ پټیل یو ځل بیا له کابله غوښتي چې په افغانستان کې د ښځو او نجونو حقونو ته درناوی وکړي. هغه <a href="https://tolonews.com/pa/afghanistan-188364">ویلي</a> که کابل دغه مسئله جدي ونه ګڼي، د افغانستان سرپرست حکومت به په رسمیت ونه پېژني.</p>
<p style="text-align: justify;">د امریکا بهرنیو چارو وزارت د ویاند مرستیال ودانټ پټیل ویلي: «د افغان ښځو او نجونو لپاره مساوي حقوق لا هم په افغانستان کې زموږ د تګلارې یو مهم اصل دی او موږ په منظم ډول له طالبانو سره د اړوندو چینلونو له لارې تکراروو چې یوازې هغه وخت کولای شي مشروعیت ترلاسه کړي چې د افغانستان نیمايي نفوس چې په ټولنه کې له ونډې او اقتصاد څخه بې برخې شوی، د افغانستان په ټولنه او اقتصاد کې برخه واخلي، که نه دا به ناشونې وي.»</p>
<p style="text-align: justify;">خو اسلامي امارت له دې وړاندې ویلي چې د ښځو حقونه د اسلامي شریعت له مخې رعایت شوي دي.</p>
<p style="text-align: justify;">دغه راز، د امر بالمعروف، نهېعن المنکر او شکایتونو اورېدو وزارت سرپرست شیخ محمدخالد حنفي د بهرمېشتو افغانانو له پلاوي سره په ليدنه کې <a href="https://pajhwok.com/ps/2024/04/17/%d8%ad%d9%86%d9%81%d9%8a-%d9%84%d9%87-%d8%a8%d9%87%d8%b1-%d9%85%db%90%d8%b4%d8%aa%d9%88-%d8%a7%d9%81%d8%ba%d8%a7%d9%86%d8%a7%d9%86%d9%88-%d8%b3%d8%b1%d9%87-%d9%84%db%90%d8%af%d9%86%d9%87-%da%a9%db%90/">ویلي</a>، هيچا ته به اجازه ورنه کړي چې د ښځو حقونه تر پښتو لاندې کړي.</p>
<p style="text-align: justify;">حنفي دغه څرګندونې کابل ته د بهرمیشتو افغانانو له یوه پلاوي سره په لیدنه کې کړې دي.</p>
<p style="text-align: justify;">کابل ته د بهرمېشتو افغانانو راغلي پلاوي <a href="https://pajhwok.com/ps/2024/04/16/%d8%af-%d8%a8%d9%87%d8%b1-%d9%85%db%90%d8%b4%d8%aa%d9%88-%d8%a7%d9%81%d8%ba%d8%a7%d9%86%d8%a7%d9%86%d9%88-%d9%be%d9%84%d8%a7%d9%88%db%8c-%d8%af-%d9%87%db%90%d9%88%d8%a7%d8%af%d9%88%d8%a7%d9%84%d9%88/">ويلی</a>، د اسلامي امارت له چارواکو سره يې د اصلي خبرو موخه د نجونو پر مخ د زدهکړو د تړلو دروازو پرانیستل، په هېواد کې د یوه ټولمنلي نظام او مسلکي حکومت رامنځته کېدل او د هېوادوالو اقتصادي ستونزو او د افغان کډوالو کړاوونو ته رسېدنه ده چې بشپړ مسوولیت او امانتداري یې د هېوادوالو غوښتنې، هيلې او اندېښې د ا.ا تر چارواکو رسولي دي.</p>
<p style="text-align: justify;"><strong>مرتضوي: ایران کې د ا.ا مخالفین د سیاسي فعالیت اجازه نه لري</strong></p>
<p style="text-align: justify;">تېره اونۍ، په کابل کې د ایران سفارت مرستیال سیدحسن مرتضوي د ریاستالوزرا له سیاسي مرستیال مولوي عبدالکبیر سره په ليدنه کې <a href="https://pajhwok.com/ps/2024/04/15/murtazavi-in-iran-opponents-of-a-a-are-not-allowed-to-engage-in-political-activities/">ویلي</a>، په ایران کې د اسلامي امارت مخالفین د عادي کډوالو په توګه ژوند کوي او د سیاسي فعالیتونو اجازه نه لري.</p>
<p style="text-align: justify;">دغه راز، مرتضوي د وروستیو نړۍوالو مسایلو په اړه د اسلامي امارت د دریځ او بهرني سیاست د ستاینې او د کابل او تهران د اړیکو پر پراختیا د ټینګار ترڅنګ ویلي، تهران د افغانستان او ګاونډیو هېوادونو ترمنځ د خرابو اړیکو پلوی نه دی او هڅه کوي څو د سیمې له هېوادونو سره د اسلامي امارت مثبت تعامل ته لاره هواره کړي.</p>
