<p style="text-align: justify;">ایبک (پژواک، ۲۷ لړم ۱۴۰۳): د سمنګان یوې اوسېدونکې سلطانې واحدي د ۴۰ زره افغانیو په پانګونې سره د لبنیاتو د پروسس کارخونه جوړه کړې او له دې لارې یې د دغه ولایت لسګونو بېوزلو ښځو ته د کار زمینه برابره کړې ده.</p>
<p style="text-align: justify;">یادې سوداګرې چې په خپل کور کې یې تولیدي کارخونه جوړه کړې، بېلابېل ډوله لبنیات او ترشي تولید او بازار ته یې وړاندې کوي.</p>
<p style="text-align: justify;">مېرمن واحدي پژواک خبري اژانس ته وویل، پنځه کال کېږي چې په لږ پانګه او اقتصادي ستونزو او د خپلو تولیداتو د پلور لپاره د مناسب بازار نشتوالي سره سره کار کوي.</p>
<p style="text-align: justify;">هغې وویل: « کله چې مې په سمنګان کې د لبنیانو برخه کې کار پیل کړ، زما سرمایه ۴۰ زره افغانۍ وه چې اوس مې سرمایه ۱۵۰ زره افغانۍ ده، که مې ملاتړ وشي کولای شم د هېواد په کچه د دغې کارخونې فعالیت پراخ کړم.»</p>
<p style="text-align: justify;">نوموړې زیاته کړه، د دې ترڅنګ چې لسګونو ښځو ته مې په خپل کور کې د کار زمینه برابره کړې، هر سهار د سمنګان د لرې پرتو کلیو له کورونو خامې شېدې راټولوي چې دې چارې هم له ۷۰ تر ۸۰ کورنیو په اقتصاد کې مرسته کړې ده.</p>
<p style="text-align: justify;">دغې متشبثې مېرمنې وویل: «کله چې موږ له لرې کورونو شېدې جمع کوو له هغو مستې، چکه، پنېر، کوچ جوړوو او دغهراز ترشي باب لکه چکني او اچار هم تولیدوو او د پلور لپاره یې د ایبک ښار بازار ته وړو.»</p>
<p style="text-align: justify;">هغه وایي، خلک باید له داخلي تولیداتو استفاده وکړي څو له یوې خوا د ښځو اقتصادي ستونزې حل شي او له بلې خوا هغوی وکولای شي خپل کار پراخ کړي او له دې لارې نورو ښځو ته د کار زمینه هم برابره شي.</p>
<p style="text-align: justify;">هغه د سمنګان له سیمهییزې ادارې غواړي چې له سوداګرو او متشبثو ښځو لا ډېر ملاتړ وکړي او د دوی د تولیداتو لپاره د ښځو یو ځانګړی بازار جوړ کړي څو متشبثې او سوداګرې ښځې وکولای شي خپل تولیدات هلته د پلور لپاره یوسي.</p>
<p style="text-align: justify;">بهشته محمدي چې یاده کارخونه کې ورته د کار زمینه برابره شوې، خوښي څرګندوي او وايي: «زما دوه کاله کېږي چې دې کارخونه کې کار کوم او له دې لارې د خپلې کورنۍ نفقه برابروم، واقعاً د خوشحالۍ ځای دی.»</p>
<p style="text-align: justify;">هغې هم له ځایي مسوولینو او موسسو غوښتنه وکړه چې له کوچنیو فابریکو ملاتړ وکړي څو نورو ښځو ته هم د کار زمینه برابره شي.</p>
<p style="text-align: justify;">سمنګان کې یوې ټولنیزې فعالې زبیدې عزتي د دې سوداګرې کړنې وستایلې او وایي، کله چې په هېواد کې ښځو ته د کار زمینه برابره شي د دې ترڅنګ چې د هغوی اقتصادي ستونزې حلېږي، کورنی تاوتریخوالی هم ورسره کمېږي.</p>
<p style="text-align: justify;">هغې هم له ښځینه سوداګرو څخه پر ملاتړ ټینګار کوي.</p>
<p style="text-align: justify;">دا یوازۍ سلطانه واحدي نه ده چې په کمه سرمایه یې په سمنګان کې نورو ښځو ته د کار زمینه برابره کړې، بلکې په سمنګان کې یوې بلې مېرمنې فرشتې ظریفي هم په ۱۰ زرو افغانیو د خیاطۍ او لاسي صنایعو برخو کې خپل کاروبار پیل کړی دی.</p>
<p style="text-align: justify;">فرشته ظریفي چې د «ابرېشم» کارخونې مسووله او د سمنګان یوه سوداګره ده، پژواک ته یې وویل، د دې ترڅنګ چې دمګړۍ ۲۰ شاګردان لري، څو ځلې یې له دې کارخونې شاګردان فارغ کړي او اوس هغوی پر ځان بسیا دي چې هر یو یې لسګونه شاګردان لري.</p>
<p style="text-align: justify;">هغه وایي: «کله مې چې دې برخه کې کار پیل کړ، ۱۰ زره افغانۍ مې درلودې او په همدې کمه پانګه او ډېرو ستونزو سره مې خپل کار ته دوام ورکړ، اوس د خدای شکر دی پر ځان بسیا یم او کولای شم چې له دې لارې خپل لګښتونه برابر کړم.»</p>
<p style="text-align: justify;">ورته وخت کې، د سمنګان د صنعت او سوداګرۍ رییس مولوي احمدخان خادم وایي چې دغه ریاست د حکومت او موسسو له لارې له شاوخوا ۱۵۰۰ ښځو ملاتړ کړی دی.</p>
<p style="text-align: justify;">نوموړي وویل چې د صنعت او سوداګرۍ وزارت له متشبثو او کوچنیو سوداګرو ښځو د ملاتړ برخه کې جدي پاملرنه لري او هڅه کوي څو له بېلابېلو لارو له کوچنيو او لویو صنعتکارانو او سوداګرو ملاتړ وکړي.</p>
