کابل (پژواک، ۱۲ کب ۱۴۰۳): د عامې روغتیا وزارت د خوړو او درملو مرستیال د پاکستان د درملو جوړولو اتحادیې او د درملو تنظیم ادارې له مسوولینو سره انلاین ناسته کې له یاد هېواده افغانستان ته د واردېدونکو درملو او خوراکي توکو پر کیفیت ټینګار کړی.
د عامې ورغتیا وزارت خبرپاڼه کې راغلي چې د یاد وزارت د خوړو او درملو مرستیال مولوي حمدالله زاهد د پاکستان د درملو جوړولو اتحادیې او د درملو تنظیم ادارې له مسوولینو سره آنلاین ناسته ترسره کړه.
خبرپاڼه کاږي، په دې ناسته کې د عامې روغتیا وزارت د خوړو او درملو مرستیال او مل تخنیکي ټیم د پاکستان د درملو تنظیم ادارې (DRAP) رئیس عبیدالله ملک، مل پلاوي او د درملو جوړولو اتحادیې مسوولینو شتون درلود چې په کې د درملو تنظیم او کنټرول برخه کې د افغانستان او پاکستان ترمنځ د ګډ هوکړه لیک، د تنظیمي پروسو چټکتیا په موخه د یو ډیجیټلي سیسټم رامنځته کېدو او د شته ستونزو حل لپاره د دواړو خواوو له لوري د استازو معرفي کېدو اړوند خبرې ترسره شوې.
د خبرپاڼې په حواله، زاهد له پاکستانه افغانستان ته د واردېدونکو درملو او خوراکي توکو پر کیفیت ټینګار وکړ او دا یې د روغتیا سکټور کې د دواړو هېوادونو ترمنځ د ګډې همکارۍ برخه کې مهم وباله.
د خبرپاڼې د معلوماتو له مخې، د پاکستان د درملو تنظیم ادارې رئیس، د خوړو او درملو معینیت په ذکر شوو موضوعات بحث د دواړو هېوادونو په ګټه وباله او د دوه اړخیزې همکارۍ ژمنه یې وکړه.
