کابل (پژواک، ۸ غویي ۱۴۰۴): د ارشاد، حج او اوقافو وزارت وایي، نن له افغانستانه په لومړۍ الوتنه کې ۲۳۰ کسان سعودي عربستان ته د حج فریضې ادا کولو په موخه ولېږل شول.
یاده الوتنه نن (دوشنبه د غویي ۸ مه) د کابل له نړۍوال هوايي ډګره د شپې ۱۱:۳۰ دقیقې د سعودي عربستان مدینې منورې پر لور ترسره شوه.
د ارشاد، حج او اوقافو وزارت سرپرست شېخ نور محمد ثاقب په دې اړه جوړه شوې غونډه کې وویل چې نن د کابل له نړیوال هوایي ډګره د سعودي عربستان مدینې منورې ته حج ته تلونکو کسانو د لېږد بهیر پیل شو او په لومړۍ الوتنه کې ۲۳۰ کسان شامل دي.
دی وايي، حج ته د تلونکو کسانو د لېږد بهیر به ۳۲ ورځو کې په ۹۷ الوتنو کې بشپړ شي.
د ریاستالوزراء اداري مرستیال مولوي عبدالسلام حنفي په نننیو مراسمو کې وویل، د اسلامي امارت مسوولین د حج پروسې ته ځانګړې پاملرنه کوي.
دی وایي، سږکال سعودي عربستان کې حج ته د تلونکو کسانو لپاره ټولې اسانتیاوې په پام کې نیول شوې دي.
نوموړي حج ته له تلونکو کسانو وغوښتل چې د کوربه هېواد ټول قوانین او اصول په پام کې ونیسي.
د ترانسپورټ او هوایي چلند وزارت سرپرست ملا حمیدالله اخندزاده په دغو مراسمو کې وویل، اسلامي امارت په تېرو درېیو کلونو کې د حج پروسې د بریالیتوب لپاره نه ستړې کېدونکې هلې ځلې کړې دي او سږکال به هم په ښه توګه ترسره شي.
دی وايي، سږکال حج ته د تلونکو کسانو د لېږد لپاره له اریانا افغان او کام ایر هوایي شرکتونو سره تړونونه شوي دي.
د یاد وزارت معلوماتو له مخې، سږ کال به له افغانستانه ۳۰ زره کسان سعودي عربستان ته د حج فریضې ادا کولو په موخه سفر وکړي او د هر حج ته تلونکي کس لپاره ۲۸۲ زره افغانۍ لګښت په پام کې نیول شوی.
د یادونې ده چې تېر کال هم له افغانستانه ۳۰ زره کسان د حج فریضې ادا کولو په موخه سعودي عربستان ته تللي وو.
GET IN TOUCH
NEWSLETTER
SUGGEST A STORY
PAJHWOK MOBILE APP