لبنان کې د یونیفیل پر ځواکونو برید؛ یو فرانسوي سرتېری وژل شوی او درې نور ټپیان دي

<p style="text-align: justify;">کابل (پژواک، ۳۰ وری ۱۴۰۵): د راپورونو له مخې، د لبنان په سوېل کې د ملګرو ملتونو پر سوله‌ساتو ځواکونو برید کې یو فرانسوي سرتېری وژل شوی او درې نور ټپیان شوي دي.</p>

<p style="text-align: justify;">رویټرز راپور ورکړی، دا پېښه هغه مهال شوې چې د لبنان لپاره د ملګرو ملتونو موقتي مأموریت (یونیفیل) ځواکونه د یوې لارې په پاکولو بوخت وو.</p>

<p style="text-align: justify;">سرچینه زیاتوي چې له ټپي شوو سرتېرو د دوو روغتیايي وضعیت نازک بلل شوی دی.</p>

<p style="text-align: justify;">د یونیفیل ځواکونو ویلي، لومړنۍ ارزونې ښيي چې دغه برید د غیردولتي کسانو له لوري ترسره شوی او په اړه یې څېړنې پیل شوې دي.</p>

<p style="text-align: justify;">د فرانسې ولسمشر امانویل مکرون دغه برید «د نه منلو وړ» بللی او له لبناني چارواکو یې غوښتي چې عاملین یې تعقیب کړي.</p>

<p style="text-align: justify;">همدارنګه، د ملګرو ملتونو سرمنشي انټونیو ګوټرېش دا پېښه غندلې او له ټولو لورو یې غوښتي چې اوربند او د جګړې درولو ته درناوی وکړي.</p>

<p style="text-align: justify;">د لبنان پوځ هم دغه برید غندلی او ویلي یې دي چې په دې اړه یې څېړنې پیل کړې دي.</p>