کابل (پژواک، ۳ زمری ۱۴۰۵): د راپورونو له مخې، د عمان یو ډیپلوماټیک پلاوی د هرمز تنګي له لارې د بېړیو د تګ راتګ د تنظیم لپاره د مناسبو لارو چارو په اړه د خبرو په موخه د ایران پلازمېنې تهران ته تللی دی.
د ایران ایرنا خبري اژانس راپور ورکړی چې تهران پرون (جمعه) د عمان د دغه ډیپلوماټیک پلاوي کوربه و.
په راپور کې راغلي چې دغه عماني پلاوی د هرمز تنګي له لارې د بېړیو د تګ راتګ د تنظیم لپاره د مناسبو لارو چارو په موخه د ایران او عمان د سلا مشورو په لړ کې تهران ته تللی دی.
راپور کې نه دي ویل شوي چې په دغه پلاوي کې د عمان کوم چارواکي شامل دي.
د یادونې ده، د ایرنا د راپور له مخې، د ایران د بهرنیو چارو وزیر سیدعباس عراقچي او د هغه عماني سیال سید بدر البوسعیدي پرون ماښام په ټیلېفوني خبرو کې د سیمې د وروستیو تحولاتو، د سمندري تګ راتګ د امنیت او د هرمز تنګي او فارس خلیج له لارې د سوداګریزو بېړیو د تګ راتګ په اړه خبرې کړې وې.
دواړو لورو د بېړیو د تګ راتګ د امنیت ساتلو پر اهمیت ټینګار کړی او د کړکېچ د زیاتېدو د مخنیوي او په سیمه کې د سولې، ثبات او امنیت د ټینګښت لپاره یې د سیمهییزو همکاریو او حللارو په اړه خبرې او سلا مشورې کړې دي.
