واشنګټن (پژواک، ٩ کب ٩٣): امريکا د کرکټ د نړيوال جام په روانو سياليو کې افغانانو ته د افغانستان د ملي لوبډلې د بريا مبارکي ورکړې ده.
په واشنګټن کې د سپينې ماڼۍ وياند جوش ارنسټ له خبريالانو سره د خبرو پر مهال د دې بريا د مبارکۍ ورکولو تر څنګ ويلي چې افغانستان د پرمختګ په حال کې دى.
هغه زياته کړې: ((د افغانانو لپاره يوه تاريخي شېبه ده او دا پر ځاى دى چې موږ بايد پر دې بريا افغانانو ته مبارکي ورکړو.))
نوموړي ويلي چې د کرکټ په اړه ډېر معلومات نه لري، خو دا معلومه شوې چې افغانانو ګټلې او په دغه هېواد کې د بريا جشن لمانځل شوى دى.
د سپينې ماڼۍ وياند زياته کړې، په نړيوال کرکټ کې د افغانستان د ملي لوبډلې بريا په دغه هېواد کې د پرمختګونو ښکارندويي کوي.
د يادونې ده، تېره پنجشنبې افغانستان د کرکټ د نړيوال جام په روانو سياليو کې سکاټلينډ ته په يوه زړه پورې سيالۍ کې ماتې ورکړه.
افغانستان د لومړي ځل لپاره په نړيوال جام کې برخه اخيستې او دا يې لومړى بريا وه.
